Napoli tan nomawi a hnai zel

Serie A hmahruaitu Napoli chuan champion an tumna lamah kawng dik an zawh leh ta, an match hnuhnungah Lazio ngam lo zuk mah se Inrinni zan khan Atalanta chu 2-0 in an hneh leh ta.

Atalanta lamin goal venhim an thupui a, chawlhlawk hmain Luciano Spalletti nauten goal an khung thei lo. Second half-ah erawh Khvicha Kvaratskhelia leh Amir Rrahmani te hmangin an khung ta tho.

Tun season Serie A bikah Napoli hian vawi 22 hnehna an chang tling ta a, match 26 aṭanga point 68 hmuin table chung berah an awm. Pahnihna Inter Milan aiin point 18 teh meuhin an sang fal - khelh hmabak 12 an la nei.

Napoli tan striker Victor Osimhen-a'n goal a khung lo, Serie A season kal laia goal 19 khung tawh striker hian ṭum hnih chu a hun ṭha a hlah, mahse Kvaratskhelia tan a siamsak ta tho.

Hmalam pana Napoli an kal zel lai hian Atalanta erawhin insiamṭhat an mamawh hle. An match hnuhnung paliah chak ni hmel an hmu ta lo, match hnuhnung paruk zinga paliah phei chuan an tlawm a ni.

Kar tawp Serie A inkhel dangah Inter Milan chu Spezia mualah 2-1 in an tlawm. Mualneitu Spezia tan second half-ah Daniel Maldini leh M'Bala Nzola ten an khung a, hun tawp dawna Romelu Lukaku penalty khungin awmzia a nei phak tawh lo.