Everton-in relegation zone an chhuahsan

Everton chuan Inrinni zan khan season thara Europe inelnaa tel tum Brentford chu 1-0 in an hneh. Goodison Park-ah Dwight McNeil-a'n minute khatna lekah a khung a, goal dang a luh belh tawh lo.

Toffees hian match 27 aṭangin point 25 an hmu a, table-ah 15-naah an awm. Chutihrualin Everton hi an hnuaia mite aia an khelh tam avangin khelh zat inangah relegation zone-a tla leh thei an ni.

Everton boss Sean Dyche chuan, "Ka player-ten huaisenna leh inrintawkna an nei chho leh ṭan a, an thawkrim em em bawk. Hnehna kan chang hi kan lawm a, chutihrualin kawng thui tak zawh tur a la awm," tiin a sawi.

Brentford hian league match 12 tlawm an neih loh hnuah an chak lo leh chauh a, he inkhel hmaa an chak loh hnuhnun ber chu October 23 daih tawh kha niin Aston Villa lakah 4-0 in an tlawm. Record duhawm tak nei tur hian Man City leh Liverpool an hneh a, Arsenal leh Tottenham te an chelh bawk.

Bees boss Thomas Frank chuan, "Tun hnai kum 12 chhung hian Manchester City leh Liverpool tih loh team dang a zawna match 12 tlawm nei lo hi engzat chiah nge awm tih ka hre mai lo. Everton lakah chesual mah ila kan che ṭha tih a pholang. Nilainia Southampton kan hmachhawn hunah kan thawhchhuah lehnghal ngei ka beisei," tiin a sawi.