Third round-ah Swiatek a lut

World number 1 Iga Swiatek chuan Indian Wells nomawi humhim ngei a tum. Nimin zing second round inkhelah Swiatek hian world number 56 Claire Liu chu 6-0, 6-1 in a hneh.

Nimin zing inkhelah hian thli a thaw nasa deuh a, tawnhriat nei lo Liu tan a harsa. Swiatek pawh buai deuh tur angin lang mah se a buai zui ta lo, Martina Navratilova (1990 leh 1991) hnua Indian Wells titile a zawna la thei hmasa nih a la beisei zel.

Kum 21 mi Swiatek hian thla hmasa khan Doha lama a nomawi kawl lai a lo humhim tawh. A match lehpekah chuan wildcard hmanga inlan Peyton Stearns leh 2021 Indian Wells champion Bianca Andreescu inkhela chak zawk a tum leh ang.

Inkhel dangah Emma Raducanu pawh a chak. Raducanu hian seeded 20-na Magda Linette chu 7-6(3), 6-2 in a hneh. US Open 2021 title a lak hnuah tun ṭum hi player lian leh langsar a hneh lehna hmasa ber a ni hial.

Britain nula Raducanu chuan, "Ka match hmasa zawkah kha chuan tihsual ka ngah, tun ṭumah erawh a tir aṭanga a che fuh zawkah ka ṭang a, tihsual neih tlem chuan chak a awlsam bik," a ti.

Inkhel dangah seeded pahnihna Aryna Sabalenka chuan darkar khat chuang deuh lekah Evgeniya Rodina 6-2, 6-0 in a hneh a, tun season kal laiah match 15 a khelh zingah 14 zetah hnehna a chang.

Swiss nula Jil Teichmann cuan doubles huanga a inlanpui ṭhin Belinda Bencic 3-6, 6-3, 6-3 in a hneh. Tsurenko pawhin Donna Vekic 2-6, 6-2 6-2 in a hneh a, Jelena Ostapenko chuan Aliaksandra Sasnovich 7-5, 3-6, 6-2 in a hneh thung a ni.