Bayern nge nge, Dortmund an tawlhthlu

Bundesliga-ah Bayern Munich-in elpui nei ve bawk mah se a sa sehah Bavarians danglamna a lang leh ṭhin. Inrinni zan khan Bayern chuan Augsburg chu 5-3 in an hneh a, inkhel dangah Schalke leh Borussia Dortmund te 2-2 in an inhnehtawk.

Julian Nagelsmann-a hote hian match 24 aṭangin point 52 an hmu a, khelh zat inangah Dortmund aiin point hnihin an sang leh ta. Bayern hian March 19 hian Bayer Leverkusen an hmachhawn ang a, April 1-ah Dortmund an mikhual ang.

Football ropuina

Paris khawpuiah Lionel Messi, Neymar leh Kylian Mbappe ten Bayern lamah goal an khung thei lo a, Munich-ah Messi leh Mbappe ten an khung thei chuang lo. Nagelsmann-a'n khawvel goal khungtu ropuite a dan theih avangin tlarhnung a rem phuiah a ngaih theih.

Mahse maw, Bayern hian Bundesliga table-a 13-na Augsburg lakah goal thum ngawt an chhuah. Augsburg hian Mergim Berisha hmangin minute hnihna lekah goal an khung. Bayern hi an indah ṭha lo a, tlarhnungah hming langsar player panga Matthijs de Ligt, Dayot Upamecano, Benjamin Pavard, Alphonso Davies leh João Cancelo te an ni.

Bavarians hi tho chhuakin 4-1 in hma an hruai a, mahse Augsburg hian Berisha penalty leh Irvin Cardona te hmangin an chhanglet. Inkhel hi Messi leh a ṭhianten a thlir a nih chuan mak an ti ve khawp ang.

Bayern attack

Bayern hian goal thum lai chhuah mah se goal nga an khung tih hriat a ṭha a, tlarhnung player-te goal bawh a nat bakah tlarhma lamah Leroy Sane, Sadio Mane leh Serge Gnabry te an awm avangin Augsburg tan an ṭha hret.

Bavarians tan Pavard-a'n goal hnih a khung bakah Cancelo, Sane leh Davies ten goal khat ṭheuh an khung. Goal nga zinga goal li hi tlarhnung lam khung a ni a, chutihrualin tlarhma lamah Mane a hlauhawm ṭhin hle. Liverpool ṭantuten Senegalese forward che vel hi an thlir a nih chuan Bayern lama an chhuahtir hi an ui ve khawp ang.

Beisei pha lo Dortmund

Dortmund-in kumin league match-ah an khingpuite an hneh chhoh char char hnuah point an hloh ta a, an hmelma Schalke nen 2-2 in an inhnehthawk. Mizo zingah Schalke hi an lar tawk lo a, chutihrualin Revierderby an tih mai Dortmund leh Schalke inkhel hi Germany-ah chuan 'derby' lian bera ngaitu pawh an ṭhahnem hle.

Veltins-Arena-ah Dortmund-in Nico Schlot-terbeck leh Raphael Guerreiro te hmangin ṭum hnih ngawt hma hruai mah se Schalke-in Marius Bulter leh Kenan Karaman hmangin an sut ve ve a ni.