I League-ah Mizo tlangvalte an champion

Pathianni khan I League chu khelh zawh a ni ta a, Mizo panga awmna RoundGlass Punjab chuan an mual Tau DeviLal Sports Complex-ah champion nomawi an chawi.

Punjab club hian match hnuhnung berah hian Trau an hmachhawn a, Luka Majcen goal hnih hmangin 2-0 in an hneh. Champion team hian match 22 aṭangin point 52 an hlawh chhuak a, pahnihna Sreenidi Deccan aiin point 10-in an hmu tam zawk. Season tharah RoundGlass Punjab hian Indian Super League an khel ang.

Mizo tlangvalte chu

I League champion kawl Mizo tlangval panga zinga pali Samuel Lalmuanpuia, Daniel Lalhlimpuia, Brandon VL Remdika leh Hmingthanmawia (Valpuia) te hi chu tualchhung football tuichilh chuan an hre vek ang.

Samuel leh Daniel te hi Chandigarh Football Academy chhuak an ni a, Zemabawk North tlangval Samuel-a hian Shillong Lajong aṭangin hming a chher a, ball a thiam avangin mipui hmuhnawm tih chi a ni.

Daniel hi Chandigarh-a a awm hnuin AIFF Elite Academy-ah a awm a, India Under-17, U20 leh U23 tan khel tawhin senior team tan pawh a inlan tawh. Serchhip tlangval hian club level-ah pawh tawnhriat a nei ṭha hle.

Brandon leh Valpuia te hi chu Aizawl FC chhul chhuak tia sawi theih an ni a, tualchhung football aṭanga hming chher chho an nih avangin hretu pawh an tam lehzual. Brandon hi palian lo mah se winger tlan chak a ni a, Valpuia erawh a chak ṭhat avangin tlarhnungah a rinawm. Punjab-ah pawh hmun pawimawh an chang pha ve ve.

Mizo zinga sulhnu nei ṭha lo ber Freddy Lallawmawma hi tun ṭum champion-na kawngah chuan a pawimawh ber zawk a, Kanan Veng tlangval hi RoundGlass Punjab aṭanga inzir chhuak niin senior team tan a khel zui. Freddy hi midfielder ball thiam tak tih tur ni lo mah se team tan a ṭangkai a, Punjab midfield-a lungpui pawimawh a ni.

AIFF Super Cup

RoundGlass Punjab hian I League nomawi an chawi avangin ISL khel turin an tling a, AIFF Super Cup-ah group stage aṭangin an khel nghal dawn. Super Cup-ah hian ISL club 11 leh I League champion te hi group stage khel turin an tling nghal.

I League aṭanga relegate Kenkre leh Sudeva Delhi te tan Super Cup-ah hmun a awm lo a, club dang pakua te erawhin qualifying an khel ang. Table hnuai lama awm Rajasthan United leh Neroca ten qualifying playoff an khel dawn a, heta chak zawk hi qualifier khel turn an tling ang.

Mizo club Aizawl FC-in qualifier aṭangin an ṭan dawn a, I League-a palina Trau nen April 6, 2023 khian an inkhel dawn. Qualifier hi EMS Stadium, Kozhikode-ah khelh a ni ang a, April 8 aṭangin Kozhikode leh Manjeri-ah te group stage hi khelh a ni dawn.

Aizawl FC hian Trau hi an hneh thei a nih chuan group B-ah Hyderabad, Odisha leh East Bengal te nen an awm ho ang. Mizo club tan ISL club hmahchhawn theih tura group stage tlin phak hi player-ten tawnhriat ṭha zawk an neih theih nan a pawimawh hle.