Man United leh table mawngphaha awm an inhnehtawk

Premier League-ah Man-chester United an che fuh thei lo a, Liverpool laka goal sarih an chhuah hnuah Pathianni zan khan table mawngphaha awm Southampton nen goal awm loin an inhnehtawk.

Man United hian nung takin ṭan mah se goal hmaah Saints an hlauhawm zawk. Theo Walcott chuan hnai tak aṭangin goal-ah tauh mah se keeper David de Gea-a'n ṭha zetin a dang.

Minute 34-naah Casemiro chuan Carlos Alcaraz a tlawh avangin referee Anthony Taylor-a'n yellow card a pe a, VAR hmanga en let hnuah red card a pe. Brazilian midfielder hian ni 39 chhung red card vawi hnih a hmu a, United tan match li a khel thei dawn lo.

Chutihrualin Europa League-ah erawh Casemiro hi a khel thei dawn thung a, Man United hian March 16, Ningani zan hian Real Betis an hmachhawn dawn.

Man United hian player 10-a an khelh hnuah goal chance an nei tho a, Armel Bella-Kotchap-a'n a kutin box chhungah ball khawih mah se penalty pek an ni lo. Raphael Varane leh Bruno Fernandes ten an khung teuh viau bawk. Saints pawhin chance ṭha an nei ve tho a, Walcott pawhin keeper De Gea chauh a hmachhawn hnuah a khung lo.

Dutch manager Erik ten Hag chuan, "Player 10-a kan khelh hnuah kan rilru put hmang a lang a, point hmu turin kan khel ṭha tawk a ni. Penalty kan hmu lo kha mak ka ti a, red card kha pawm a har bawk. Casemiro hian Europe-ah match 500 chuang a khel tawh a, tun hmain red card a hmu ngai lo. Referee khan result a thlak a ni," tiin a sawi.