City dal theitu RB Leipzig

Manchester City-in Pep Guardiola hnuaiah nomawi ṭhahnem tak an chawi tawh a, Premier League-ah ringawt pawh vawi li an champion tawh. Mahse, City hian Champions League nomawi an la chawi ngai lo a, zanin dar 1:30 hian RB Leizpig an mikhual dawn a, an chak lo a nih chuan Spanish manager Pep-a sawiselna a ri ring leh khawp ang.

Premier League champion hian February thla tawp khan Red Bull Arena an tlawh a, chak tura rin zawk ni mah se German club nen hian 1-1 in an inhnehtawk. English club-in Riyad Mahrez hmangin an khung hmasa a, Josko Gvardiol hmangin Leipzig-in an sut.

UEFA hnuai inelnaah away goal rule a awm tawh lo a, City hian first half thunun mah se goal khat bak an khung theih loh avangin second leg-a an dinhmun ṭhatna chu an muala an inkhel tur chauh hi a ni.

Man City hian kartawp hian Crystal Palace chu 1-0 in an hneh hram a, Erling Haaland-a'n chakna goal khung mah se a goal khungna hi penalty a ni. Norwegian striker hian season ṭantirh lamah goal a khung chho pawp pawp a, tun hnaiah erawh chance a neih tam loh bakah a neih ang chhunah a hlah nasa.

Amaherawhchu, Leipzig tan Haaland hi ngaihthah a thiang chuang lo a, Pep-a'n hmun pawimawh a chantir avangin ven uluk zel a ṭul ang. German club tana chanchin duhawm lo erawh March thlatira Borussia Dortmund an hneh loh ṭumin midfielder Xaver Schlager leh forward Christopher Nkunku te an inhliam.

Man City hian an mualah record ṭha tak an neih avangin Leipzig tan a harsa dawn bawk. Pep Guardiola chuan, "First leg ai chuan team dinhmun a ṭha tawh zawk a, quaterfinal luh dan kawng kan zawng ang," tiin chak hrim hrim a pawimawh thu a sawi.

Leipzig coach Marco Rose chuan, "Kan tlan taimak a, ball kan chan bawk chuan team dang daih kan ni. Manchester City hi team ṭha an nih avangin first leg-a kan draw hi kan tan result ṭha a ni a, Etihad Stadium-ah pawh kan theihna lantir kan tum ang," tiin City hneh an tum thu a sawi ve bawk.