A chung ber chu Arsenal awmna hmun

“Kan champion dawn...” tiin Arsenal ṭantute an au rual dual dual a, an duhthusam leh beiseina hi a tak ram thleng zo tak ang maw. Gunners chuan Fulham 3-0 in an hneh - Mikel Arteta naute hi Premier League table chung berah an awm chhunzawm.

Pathianni zan Craven Cottage-a inkhelah Arsenal tan defender Gabriel Magalhaes leh Gabriel Martinelli ten an tauh luh hnuah a hmuna inkhel entute chu “Kan champion dawn...” tiin an au rual a, captain Martin Odegaard chuan a khung belh bawk.

Champion lai leh pahnihna dinhmun luahtu Manchester City inkhel result hresain Arsenal an inlan a, point hloh ni se la chuan an hmahruaina a derthawng thei, mahse nuamsa taka chakin point nga bawkin an sang fal leh ta a ni.

Laipui a puak

Granit Xhaka-a through ball fing leh Martinelli tlan chakna hmangin Arsenal hian goal an sual chhuak a, mahse Video Assistant Referee (VAR) an hman hnuah Martinelli hi tlemte chauhin a lo offside zeuh a, an goal hi an hnawlsak.

Leandro Trossard hun a thleng zui - Belgium international corner pet hi Gabriel-a'n a tuh lut a, a hnuah box chhunga a cross luh chu Martinelli-a'n a lo tauh lut leh nghal. Martinelli vengtu Antonee Robinson a zuang ve eih lo khan mak tih a hlawh.

Brighton aṭanga an lakluh Trossard-a'n a la duhtawk mai lo, chawlhlawk hma deuhin Odegaard goal khung tur a siamsak leh a, first half chhungin assist vawi thum a nei hman der! EPL-ah hun chanve hma lama asisst vawi thum nei thei hmasa ber a ni.

Second half-ah Fulham tana Bobby de Cordova-Reid hun ṭha chu keeper Aaron Ramsdale-a'n a lo dansak a, defender Tosin Adarabioyo-a ball tauh pawhin bar a per hlauh, khualmualah Mikel Arteta nauten goal chhuah loin point thum an hlawh chhuak.

Arsenal an phur

Thlasik bazarah Arsenal hian Mykhailo Mudryk lei an tum a, mahse a man a tam tham avangin an lei thei lo. Pound maktaduai 21 sengin Trossard chu Brighton aṭangin an lalut - EPL tawnhriat nei ṭha a ni a, duh an thlang sual lo hle.

Santi Cazorla (2012-13) hnu lamah chuan Trossard hi season khata goal leh assist hmanga hattrick siam thei hmasa ber a ni hial. Cazorla hming nena sawi dun a ngai hian Gunners lung a ti leng ang a, an khelh dan leh pumrua chhutin Trossard nen an hmehbel chhunzawm ngei ang.

Minute 77-naah bench aṭangin Gabriel Jesus a rawn lut a, khup hliam an zai hnua match a khelh lehna hmasa berah goal keng tel ngal lo mah se fans lawm a hlawh leh nghal hle - an elpui club dang tan Jesus lo kir hi chanchin ṭha a ni ve lo thung.

Jesus khan EPL match hmasa 14-ah bul a ṭan vek a, point ngain hma an hruai. A awm loh karah match 12 an lo khelh belh a, a lo kir leh pawhin point nga thoin an fal. Arteta-a'n team a remkhawm thiam tih a chiang a, striker Jesus nen chuan an ṭha leh zualin a rinawm.

Fulham dinhmun

Season tirah khan Fulham awmna tur inrinsiak ni ta se, tuna an awmna hi an thlen phak ringtu an tam lo ang. Coach Marco Silva-a'n beisei phak baka ṭhain hun a hman pui a, club lian dangte elphakin European football an beisei ngam hial.

Fulham hian parukna Liverpool an phak lohna chu point thum chauh a ni. Arsenal lakah an ṭhat dan berin an khel thei lo a, tawnhriat nei ṭha William chu a tihrawl a hliam bakah Joao Palhinha chu hrem vangin a inlan thei lo bawk.

Striker palian Aleksandar Mitrovic-a'n season kal laiah goal 11 khung tawh mah se tun hnaia a ke a hmui lo. Serbian striker hian January thla hnu lamah goal a la khung leh lo, hnehna changa kawng dik an zawh leh theih nan a hna ngai a thawh a ngai.

Kum 45 mi Silva chuan, "Arsenal khan hnehna chan an phu tih chu ka hria, chutih rualin goal kan chhuah dan kha a ho lam ve deuh bawk a ni. Ka naute hnenah chuan tuna kan result aṭang hian kan tho chhuak tur a ni, tih ka sawi hmasa ber," a ti.