Indian Super League: Mumbai-in final an thleng zo lo

ISL league round-ah tlawm nei loin hmahruaitu an nihna an nemnghet a, league winner an nih chian hnuah match hnih an tlawm thung - an hming chu Mumbai City a ni a, semifinal-ah chuan tho leh mai tura ngaih an ni.

Mahse, Mumbai an tho tawh lo a, league round-a team hmuhnawm leh thiam ber ang hiala ngaih kha an zinkawng tawpna chu semifinal a ni - Pathianni zan khan semifinal second leg-ah Bengaluru an ngam lo a, Sunil Chhetri leh a ṭhianten final an khel dawn.

ISL semifinal first leg-ah Bengaluru hian 1-0 in Mumbai City an hneh a, Mumbai forward Lallianzuala Chhangte chuan, "Kan comeback leh theih ngei ka beisei tlat a ni," tiin Vanglaini a hrilh.

Mumbai hian 2-1 in Bengaluru an hneh let ngei a, inkhel hmasa nen 2-2 a ni. Team pahnihin penalty hmangin chak zawk an zawng zui a, a tawpah 9-8 in Bengaluru an vannei ta zawk a, final an lut.

Inkhel hmuhnawm

Bengaluru khelmualah Mumbai-in chak an mamawh tih an inhria a, inkhel ṭantir aṭangin Bengaluru an nawr na - minute riatna lekah mualneitu goalkeeper Gurpreet Singh Sandhu a che sual ta nge nge a, Mumbai-in penalty an hmu.

Mahse, penalty pettu Greg Stewart-a'n a pet chhe takzet a, a per lehlam chu Lianzuala'n pet hman mah se duhthusama ṭhain a pet hman lo - Gurpreet-a'n a dang nawn a, Bengaluru fans thawm chu ring tak a ni.

Hun tam a liam hman lo - Sivasakthi Narayanan-a cross ṭha zet chu Javi Hernandez chuan minute 22-naah a tauh lut a, goal mamawhna nasa zawk Mumbai-in goal an chhuah hmasa a, 2-0 a ni der tawh.

Bengaluru khelmuala inkhel an ni bawk si a, Mumbai tan hmabak a hautak zual sawt a, mikhual team hi an tho thei ang em, tih chu zawhna awm a ni.

Thawnthu ngaihnawm

Mumbai-in hmabak hautak nei mah se an hnual phah lo - minute 31-naah Bipin Singh chuan innghahna tlak a la ni reng tih pholangin si phurh a sut a, Mehtab Singh chuan minute 66-naah a belhchhah bawk.

Mumbai-in 2-1 a hma an hruai chiah hian, inkhel hmasa nena belhkhawmin 2-2 a ni a, team pahnih tan boruak a sang hle - minute 120 chhungin goal dang a lut lo a, penalty hmanga chinfel a ni.

Penalty-ah pawh team pahnih an inhnehtawk hle - Bengaluru tana pet zawng zawngin an chhuih goal laiin, Mumbai tan hmahruaina goal khungtu Mehtab Singh-a'n a hlah a, Mumbai an tla.

Bengaluru hi ISL-a an match hmasa 12-ah vawi riat an tlawm a, vawi thum chiah chakin, vawi khat draw an nei a, mahse, tunah chuan final an lut ta - an match hnuhnung 10-ah an chak vek a, English coach Simon Grayson hoin thawnthu ngaihnawm an ziak.

A ṭha zawk

Lianzuala'n semifinal khelh hmain ISL-ah goal 10 zet khungin player 'hot' ber pawl a ni a, mahse, Mizo forward hian Mumbai tana season duhawm a hman ṭumah league nomawi a chawi dawn lo.

Heti chung hian Lianzuala'n lungawi a zir a, Lunglei tlangval chuan, "Penalty hi chu vanduai a awm lo thei lo a, a vanduai zawkah kan ṭang a ni. Pathianin thil ṭha zawk min dahsak a ni ang," tiin Vanglaini a hrilh.

Tun season ISL-a Indian player zinga goal 10 khung tling awmchhun Lianzuala chuan, "Pathian min hruaina ka ngaihtuah a, season hmasaa ka hun hman dante nena thlir phei chuan ka mimal season bikah chuan ka lawm khawp mai. Mahse, hei aia ṭha zawk hian ka la khel thei tih ka hria a, a hma aia nasain ka bei ang.

"Mizo mipuite min lo ṭawngṭaipuina zara tun dinhmun hi thleng thei ka ni tih ka inhria a, an chungah lawmthu ka sawi. Min lo hre chhunzawm zel turin ka ngen bawk," tiin Vanglaini a hrilh. Hetihlai hian Mumbai tan midfielder Lalengmawia Ralte (Apuia) chu kerek hliam vangin a inlan thei lo.