Inzaghi tan insiamṭhatna hun

Inter Milan manager Simone Inzaghi chu ban mai theih dinhmunah a ding mek a, atan zanin hi insiamṭhat theina remchang a ni ang. Italian club hian zanin dar 1:30 hian Porto an lenchilh dawn a ni.

Champions League last 16 first leg-ah Inter hi 1-0 in an chak, tlang turin goal chhuah loh a tawk. Chutih rualin Portuguese team hian thapui an thawh dawn avangin Inzaghi naute tan goal ven chauh ni loin khung belh tum a finthlak ang.

Inter hian Serie A lamah tlak hlau Spezia 2-1 in an ngam lo hlim a ni a, an elpui leh hmahruaitu ni mek Napoli an phak lohna chu point 18 zet a ni mek, anmahni fans ngeiin an au el tawh - insiamṭhat an mamawh takzet a ni.

An khelh fuh ni chuan Inter Milan hi team lian hneh turin an ṭha tawk, group stage lamah pawh Barcelona nek chhuaka last 16 lut thei kha an ni a, chuvangin Porto paltlang hi an tan thil harsa tak ni turin a lang lem lo.

Romelu Lukaku a dam tawh, ani hi an intawn hmasaka goal awmchhun khungtu kha a ni. Belgian striker hian Spezia lakah penalty a chhuih lut bawk a, a ke chheh a ti rem chho leh tawh hle.

Porto hi first leg an khelh dan chhutin tlawm sa tur ngawt an ni bik lo. Lukaku-a'n goal a khung hma khan Marko Grujic, Mehdi Taremi leh Zaidu Sanusi ten goal khung theihna remchang an nei vek a, an chhawr ṭangkai lo mai chauh a ni.