Buaina kara leng Barca-in hmahruaina sawh nghet

Referee hnena thamna sum pek chungchangah Barcelona-in hmingchhiatna nasa tak tawk mah se, khelmual pawn lama an buaina hian khelmual chhungah nghawng a neih an phal lo a, La Liga-a an hmahruaina an sawh nghet zel.

Catalan club hian Pathianni zan khan an mikhualna ramah Athletic Bilbao chu 1-0 in an hneh a, Raphinha chuan inkhela goal awmchhun khungin, a team hi 1-0 in hnehna a chanpui a ni.

Barcelona-in hnehna an chan avangin table chung bera an dinhmun chu an sawhnghet a, Inrinni zan khan anmahni hnaih bertu Real Madrid chuan hnehna chang ve bawk mah se Madrid khaw club ai hian point kua ngawtin an la sang zawk.

European football-a beisei tur nei tawh lo Barca hian an match khelh leh hmasak berah El Clasico an khel dawn a, March 19 zanah Real an mikhual dawn - Real erawhin hemi hma hian Champions League round of 16 second leg-ah Liverpool an mikhual dawn.

Lewy a lo kir

Barcelona tan hliam vanga match hnih a khelh loh hnuah striker Robert Lewandowski a lo kir leh ta a, Poland international hian goal khungna remchang a neih erawh a chhawr thei lo.

Lewy hian first half ṭantir lamah chance duhawm nei mah se Bilbao keeper Julen Agirrezabala chuan ṭha zeta tlan chhuakin, Lewy hun ṭha neih hi a dansak a, Bilbao an phur phah sawt niin a lang.

Mualneitu team hian rang takin Barca hi an nawr let nghal a, mahse, Inaki Williams hun ṭha neih chu Barca goalkeeper Marc-Andre ter Stegen chuan ṭha zetin a dansak a, corner aṭanga ball kal chu Raul Garcia chuan bar tauh per nan a hmang bawk.

Mahse, 'Barcelona nge nge,' a tih loh theih loh - first half hun pek belhah Raphinha a inlar a, Leeds United aṭanga Catalan club zawmtu hian ṭha zetin a chhuih goal a, 1-0 a ni.

A chak zawk

Brazil international Raphinha goal khung hi a tirah offside vanga pawm a ni lo a, mahse, video assistant referee hmanga ennawn a nih hnuah pawmsak a ni a, Barca an hlim.

Second half-ah Bilbao an hmuhnawm zawk a, an goal nawr pawh a na zawk. Alex Berenguer leh Iker Muniain ten chance duhawm tak an neih chu German keeper Ter Stegen bawkin ṭha zetin a dansak ve ve a, Bilbao an vannei tawk lo, tiin a sawi theih.

Bilbao vanduai a kaltluang laklawh - hun tawp nan minute khat chiah a awm tawh tihah Williams chuan si phurh sutna goal a khungah inngai mah se, VAR hmanga ennawn a ni a, pawmsak an ni lo!

Inaki Williams goal khung hma hian Munian chu chiang takin a lo handball - referee-in uluk taka a en let hnuah goal-ah a pawm lo a, vannei takin 1-0 in Barca an chak a, an coach hlui, Bilbao enkawltu Ernesto Valverde tan mangchhia an nih chhunzawm zel.

Lawm lo Real

Buaina karah Barca an chak a, hetiang kara an hmelma lawmna lawmpui thei lo lo lang chu Real Madrid an ni - Barca hi Spain rama referee committee vice-president hlui Jose Maria Enriquez Negreira hnena sum peah puh an ni a, hemi chungchangah hian an mualpho hle.

Barca hi a tirah chuan kum 2016-2018 inkar khan Negreira-a company hnenah pound maktaduai 1.2 pea puh an ni a, a hnuah kum 2001-2018 inkar khan Barca hian Negreira hi euro maktaduai sarih an pek thu tarlan a ni.

Inrinni khan Barcelona hi Spain rama dan hremite chuan referee hnena thamna sum pe ngeiah an puh a, hei hi zirchian mek niin, thutlingah ngaih a nih chuan Barca hi thubuai siamsak an ni dawn.

Real chuan thuchhuah siamin, dan chungah rinna an nghah tlat thu an sawi a, Barca puhna chu thutlinga pawm a nih hunah dan anga hmalak ngei a nih theih nan, thuneitute an thawhpui tur thu an sawi.