Juventus beiseina a la nung

Serie A point 15 an hmuhsa an paihsak a, dan an bawh chhiat vang a ni - dinhmun harsa takah ding mah se Juventus chuan season thara European football khelh phak ngei tumin thapui an la thawh zel.

Old Lady hian Pathianni zan khan table mawngphah luahtu Sampdoria chu 4-2 in an hneh a, point 38 hmuin Serie A table-ah pasarihna dinhmun an luah, match khelh hmabak 12 an la neih chu a ṭha thei ang bera hman an tum ang.

Massimiliano Allegri-a'n hliam vangin midfielder Paul Pogba a chhawr thei lo a, player pawimawh dang - Angel Di Maria, Federico Chiesa leh Alex Sandro te an inlan theih loh bawk avangin an ṭhat dan berin an khel thei lo.

Allianz Stadium-ah Adrien Rabiot chuan goal hnih a khung a, Gleison Bremer leh Matias Soule ten goal an khung bawk. Goal hnihna hma an hruai hnuah an in sut zawh tira a, a tawpah erawh goal hnih bawkin an kal fal leh a ni.

Juve manager Allegri chuan, "Tlarhnung lama tawnhriat nei player-ten a naupang zawkte an kaihhruai a ngai hle tih a takin kan hmu, mahni muala goal hnih kan chhuah a nih chuan insiamṭhat kan ngai," a ti a, midfielder Rabiot a fak hle thung.

Pathianni zan inkhel dangah AS Roma chu Sassuolo lakah 4-3 in an tlawm. Chawlhlawk hma deuhin Roma defender Marash Kumbulla chu hnawhchhuah a ni a, player tlem zawka an khelh hnuah goal hnih an chhuah.