India-in Australia lakah series an la

Border-Gavaskar Trophy match hnuhnung berah India leh Australia te an inhnehtawk a, Rohit Sharma hoten 2-1 in series an la. Mikhual Aussies hian first innings-ah 480 runs an siam a, chak turin an dinhmun ṭha mah se India-in Shubman Gill leh Virat Kohli century hmangin 571 runs-in an chhanglet a, ni nga chhungin chak zawk an awm ta lo.

Test match vawi li khelhah India hian match hmasa pahnihah hnehna an chang a, match thumnaah Aussies chiang takin an chak. Match tawp ber hi Narendra Modi Stadium-ah March 9 aṭang khan khelh ṭan a ni a, mikhual team hian bat hmasak an thlang.

Aussies tan Usman Khawaja (180) leh Cameron Green (114) ten century an siam a, 480 runs tehmeuh an siam avangin India tana ṭha ber chu draw niin a ngaih theih.

India bat hun a thleng a, captain Rohit Sharma-a'n 35 runs chauh siam mah se a kawppui Shubman Gill-a'n 128 runs tehmeuh a rawn siam. Cheteshwar Pujara-a'n 42 runs a rawn belh hnuah Kohli-a'n 186 runs a rawn vaw chhuak a, Axar Patel-a'n 79 runs a rawn belh bawk avangin India-in 571 runs an siam tling.

Test match hi ni nga khelh a ni a, first innings khelh nan ni li chhung hman a nih tawh avangin chak zawk awm tur chuan thilmak a thlen a ngai. Australia-in ni nganaah 175/2 runs an siam hman a, hunin a daih ta lo - team pahnih an inhnehtawk.

India leh Australia te hian ODI match thum an khel chhunzawm dawn a; March 17, Zirtawpni tlai dar 1:30 hian Wankhede Stadium-ah match hmasa ber an khel ang.

Test match inkhel dangah New Zealand-in Sri Lanka an hneh a, Lions tan series a lak theih tawh loh avangin World Test Championship-ah India an umpha thei tawh lo. Rohit Sharma hote hian Australia nen June 7, 2023 hian Oval-ah final an khel ang.