Newcastle Champions League beiseina a la thi lo

Premier League match nga zet a zawna an chak zawh tawh loh hnuah Newcastle United an insiamṭha ve leh ta a, season tharah Champions League khelh an la tum reng tih pholangin, mikhual Wolverhampton Wanderers chu 2-1 in an hneh.

St James' Park-a inkhelah Magpies tan Alexander Isak chuan minute 26-na lekah goal hmahruai a khung a, mualneituin goal an khung hmaa penalty beiseitu Wolves-in na an ti vawng vawng ang.

Isak-a goal khung hma minute rukna velah Magpies keeper Nick Pope chuan Wolves striker Raul Jimenez a titlu niin a lang a, mikhual team hian penalty hmuh inbeisei mah se referee Andy Madley-a'n an ngaihdan a ṭawmpui lo.

Pound maktaduai 60 vela nipui transfer-a Magpies pantu Isak-a goal hi Kieran Trippier-a freekick pet aṭanga kal a ni a, Isak hian amah vengtu dah ṭhain ṭha zetin a tauh lut.

Magpies tan Bruno Guimaraes chuan chance nei zui mah se goal-ah a chantir thei lo a, hnai set sawt aṭangin bar a tauh per - mahse, Wolves-in khualmualah hnufual reng an duh bik lo.

Minute 70-naah Magpies player Trippier a chesual a, a chetsual zarzoin Hwang Hee-chan chuan mikhual tan si phurh sutna goal a khung - minute 20 chiah a awm tawh avangin team pahnih hi an inhnehtawk mai rinna a lian hman hle.

Mahse, beisei ang ngawtin thil a kal bik lo. Minute 79-naah bench aṭanga luhtir Miguel Almiron chuan luhtir a nih chhan pholangin, goal a khung a, hun tawp thlenga goal dang lut loin, Magpies hi 2-1 in an chak.

Newcastle-in hnehna an chan avangin table-ah panganaah an invawrh chho a, an hnuai chiaha awm Liverpool aia match khata khel tlemin, point hnihin an sang a, palina Tottenham Hotspur aia match hnih ngawta khel tlemin, point li chauhin an phak lo mek.