Thilmak beiseitu Liverpool an tho thei dawn em?

Liverpool-in tun season-ah tluk leh din an fawm a, he team hi tun season-ah zet chuan, "hmeichhe ngaihtuahna," ang mai an ni - hriatthiam an har!

Jurgen Klopp-a team hian zanin dar 1:30-ah Real Madrid chu khualmualah an lenchilh dawn a, Champions League semifinal second leg an khel dawn - quarterfinal lut turin thilmak an mamawh.

A chhan maw? Anfield-ah Reds hian 2-0 ngawtin hma hruai hman mah se, 5-2 in Real an inlehthal tir a, Champions League champion beiseina neih chhunzawm turin si li fai tala an chak a ṭul!

Football ngainatu tam takin zaninah men rei kher ṭul an ti dawn lo. Real hi tlangsaah tam takin an ngai a, an demawm lo - meng rei thlawn nihna chance a sang. Liverpool fans erawhin ngaihdan dang an nei a, thilmak an la beisei tlat. Reds defender Virgil van Dijk chuan, "Football hi chu thilmakin a khat a, thilmak kan thlentir theih kan beisei," tiin a lo sawi tawh bawk.

Beiseina neitu

Kum 2015-a Jurgen Klopp-a'n Liverpool a enkawl khan media a hmachhawn hmasak berah, "Ringhleltute chu beiseina kan siamsak dawn a ni," a ti a, kum 2023 a herchhuah meuh chuan he team tan hian Premier League, FA Cup, League Cup, Community Shield, Champions League, UEFA Super Cup leh FIFA Club World Cup nomawi a chawi ta.

German coach hian beiseina chu a tak ram a chantir a, ringhleltute pawhin an ringhlel tawh lo. Mahse, chu an rinna chu tunah hian sawi nghinin a awm mek a, a sawi nghingtu chu Anfield-a goal nga an chhuah kha a ni a, tun season-a an 'form' hi a ni bawk.

Liverpool hian Real an paltlang lo a nih chuan tun season-ah nomawi chawi an nei dawn lo tih a chiang ang a, nikum lawka season tawp thlenga nomawi pali chawi beiseitu thawnthu hi her danglamin a awm dawn.

Reds fans tam takin hei hi an ngaingam lo a, zaninah thilmak an beisei. He team hi Barcelona laka 3-0 a an hnufual hnua lo comeback tawh kha an ni a, Steven Gerrard hoa Istanbul khawpuia an thilmak tih pawh hriatin a la awm reng - a tawi zawnga sawi chuan, thilmak thlentir thei an awm a nih ngai chuan Liverpool ngei hi an ni ang.

Mahse maw...

Liverpool hian Real Madrid laka an mualpho hnu lawkah khan comeback turin theihna an nei sang tawk tih an pholang a, an intawn hmaa khel ṭha thei tak Manchester United chu 7-0 ngawtin an sawp.

Liverpool fans thla a muang a, United laka goal sarih khung thei team tan Real laka goal li khung hi engvangin nge a harsat ang? tih an rilruah a awm a, an demawm hran lo.

Mahse, Liverpool fan-te hlim chhung chu chhum rei lo tê lo lang a, ral leh ang chauh a ni a, season ṭantira 9-0 ngawta an sawp Bournemouth lakah 1-0 in an tlawm a, Cherries laka goal khung harsat team tan Real zuam a harsa ta.

Real lakah comeback an tum tak tak a nih chuan Mohamed Salah, Darwin Nunez leh Cody Gakpo ten goal khung an uar a ṭul a, Anfield-a nghing nasa tak tlarhnungin an team tana nghet taka din an zir a ṭul bawk.

Benzema a dam!

Liverpool fans tana chhiar nuam lo tak pakhat chu Karim Benzema a dam hman hi a ni. French striker hi tun season-ah a inhliam ngun hle a, tun season-ah hliam vangin match 14 zet chu a khel lo tawh.

Mahse, Real tan tun season-a match 27 a kheh aṭanga goal 18 khungtu hi tunah chuan a dam leh tawh a, club training a zawm leh tawh - Liverpool fan-ten French striker dam hman hi pawi an ti hial ang!

Real tan hian defender Ferland Mendy chuan club training a zawm ve leh tawh bawk a, zanina hmun a chang nghal dawn leh dawn loh erawh sawi lawk theih a ni lo - tawnhriat nei ṭha David Alaba erawh hliam vangin a inlan thei dawn lo chiang.

Carlo Ancelotti enkawl Real hian Liverpool an hmachhawn zawhah league match khel turin Barcelona an lenchilh zui a ṭul dawn a, La Liga-ah beisei an la neih bawk si avangin Italian coach tan rilru fim tak hman a ṭul dawn.

Tute nge inlan dawn?

Real-in 4-3-3 formation an rawn hman a rinawm a, chuti a nih chuan a hmatawngah Benzema awmin, Federico Valverde leh Vinícius Júnior ten an thlawp a rinawm a, Ancelotti-a'n Benzema inlan nan a la hma hretah a ngai a nih chuan Rodrygo chu 'false nine' a hmangin, a chhawr leh ngei a rinawm.

Madrid khaw club tan si ban nghak tura Thibaut Courtois aia duhthlan bik tur an awm chuangin a rinawm lo a, a hmaah Antonio Rudiger leh Éder Militão dingin, Dani Carvajal leh Nacho Fernandez ten an thlawp thei ang.

Midfield-ah Luka Modric leh Toni Kroos an awm chhung chuan Reds tan manganna tur a awm lo a, Liverpool aia Real thlangtu Aurélien Tchouaméni a awm bawk - anni pathum hi team pahnih inkara danglamna siam tur khawpin an ṭha tawk.

A tawi zawnga sawi chuan Real-in champion pui tham squad an nei a, si thum fai zeta an hmahruaina hi an hloh a nih ngat chuan coach 'King Carlo' dinhmunin derthawn lam a pan zui ang.

Liverpool an ṭha?

Tlarhmaa Salah, Gakpo leh Nunez tlar thei team tan an ṭhat tawk loh thu sawi a mawi lo a, Luis Diaz la inhliam mah se Diogo Jota leh Roberto Firmino an la awm cheu bawk avangin Reds hi Santiago Bernabeu-a thilmak thelntir turin a ṭha tawk.

Mahse, midfield hi Reds-in Real an phak lohna, tia huaisen taka sawi ngam lai niin a lang. Hliam vangin Thiago Alcantara dinhmun a la chiang lo a, Reds-a beisei phak lo Naby Keita hi inlan thei pawh ni se uanpui viau tur khawpa player ṭha a ni lo.

Chuti a nih chuan beisei anga season hmang lo Fabinho leh chuai lam pan ve ṭan ta anga lang Jordan Henderson ten bul an ṭan ngei a ngai dawn a, kum 18 mi Stefan Bajcetic hi thiam viau mah se Bernabeu boruak sanga Modric leh Kroos kara vul turin a ṭha tawk ang em? A chhanna pek harsa tak a ni.

Goalkeeper Alisson erawh a la rintlak reng a, French defender Ibrahima Konaté leh Virgil van Dijk an inkawp theih chuan tlarhnung a nghet sawt ang a, Trent Alexander-Arnold leh Andy Robertson te mawhphurhna a sang leh dawn bawk - Reds hian Real zawhah Manchester City (khualmual), Chelsea (khualmual) leh Arsenal (Anfield) a zawnin league-ah an tum dawn tih theihnghilh lo ila!

UEFA Champions League

Round of 16 - Second Leg

March 15, Nilaini Zan
Napoli 01:30 AM Eintracht Frankfurt
Real Madrid 01:30 AM Liverpool