Hazard leh Ancelotti an inbe ngai lo!

Spanish La Liga-ah Real Madrid-in point kua zetin hmahruaitu Barcelona an phak lo mek a, Spanish Super Cup semifinal-ah Barcelona an ngam lo a, Copa del Rey semifinal first leg-ah 1-0 in Barca an ngam lo bawk.

A tawi zawnga sawi chuan Real tana tun season-a beisei san theihna ber chu Champions League a ni a, mahse, zanina last 16 second leg match pawimawh an khelh dawn lai takin Eden Hazard-a'n chanchin lawmawm lo a lo nei!

Hazard hian kum 2019 khan pound maktaduai 150 thlenga a man sang chho thei turin Real hi a zawm a, hetihlaia a boruak leh tun dinhmun chu inmil lo tak a ni - World Cup zawh hnuah a in fit reng chungin La Liga emaw Champions League-ah emaw a la inlan miah lo.

Belgian forward chuan, "Ancelotti nen hian kan inzah tawn em em a, mahse, kan inbe ṭhin anga dawt sawi erawh ka tum lo - kan inbe ngai tlat lo alawm. Mahse, kan inzah tawn reng ang," a ti a, a coach nen an inbiak ngai loh thu a sawi!

Hazard hian a coach hi fak zuiin, "Ancelotti ang hi chuan, football leh a career-a a thil tih zozai avang ringawt pawh hian zah a phu a ni," a ti - an inbiak ngai loh thu erawh a sawi miau avangin, fans tam tak chuan hun lo an ti khawp ang.

Belgium tan match 126 a khelh aṭanga goal 33 khungtu, World Cup zawha ram tana inkhelh a chawlhsan thu puangtu Hazard hian Real-ah hian kar khatah £400,000 a hlawh mek a, ani aia hlawh hnem hi Real player zingah an awm lo.

Hei vang hi a ni mai thei - kum 2021 nipui lai aṭang tawh khan Real-in chhuahtir dan ngaihtuah mah se Hazard hian chhuah tumna a la nei rih lo a, June 2024-a a contract zawh hun thleng Real-ah hian cham a tum.

Hazard chuan, "He hmunah hian cham ka duh a, he thu hi chu ka sawi fo tawh. Khelmuala inlan a, ka la ti thei reng a ni tih pholan ka duh a ni," a ti a, hlawhchhama Real chhuahsan a hreh thu a sawi.

Chelsea legend Hazard hi Real-ah hliam vangin a talbuai ngun tih chu sawi nawn a ngai lo. Mahse, a dam ṭhat reng lai pawhin Real tan a inlan phak meuh lo a, Santiago Bernabeu-a chhawr theiha a awm laia match 199 an khelhah vawi 73 chiah inlanin, 36.7% chiah a khel tihna a ni!

Match 199-ah hian vawi 43 chauh bul ṭantir niin, chu chu 21.6% a ni a, hliam vangin ni 500 zet chu chhawr theih lohin a awm bawk - Chelsea-ah season sarih a cham chhung khan ni 198 chiah hliam vanga chawlh a nei thung.