Bagan an chak - ISL final khel tur a hriat ta

Indian Super League final khel tur a hriat ta - Thawhṭanni zan khan ATK Mohun Bagan leh Hyderabad FC chu 0-0 in an inhnehtawk a, Bagan chuan penalty hmanga 4-3 a hnehna changin final an lut.

Team pahnih hi semifinal first leg-ah goal khung loin an lo inhnehtawk tawh a, second leg-ah pawh thawnthu a danglam lo - team pahnihin goal khung an harsat a, minute 120 hnuah pawh 0-0 a ni.

Penalty hmangin final lut tur chinfel a ni a, Bagan tan Brendan Hamill-a'n a hlah laiin, Hyderabad lamah Bartholomew Ogbeche leh Javier Siverio ten an hlah a, 4-3 in Bagan an chak.

Mohun Bagan-ah hian Mizo midfielder K. Lalṭhathanga (Puitea) leh Lalrinliana Hnamte (Terina) an awm a, Mizo pahnih awmna club-in ISL final an khel dawn e.

Inveng tawn

Salt Lake Stadium, Kolkata-ah fans 50,000 chuang an pungkhawm a, Bagan chak lai hmuh tum an ni - mahse, first leg-a goal khung lo team pahnihin vawi khat tihsual pawizia an hria a, tlarhnung lam an ngai pawimawh hmasa.

Bagan hian minute 22-naah chance duhawm an nei a, mahse, Manvir Singh chuan mawi zeta amah vengtute a bum hnuah uiawm takin crossbar a pet per. Team pahnih an inveng tawn a, chance hlauhawm dang sawi tur first half-ah a awm meuh lo.

Second half-ah Hyderabad-in chance hlauhawm nei hmasa zawk mah se striker chhuanvawr Ogbeche chuan goal khung nan a hmang thei bik lo a, Bagan tana Hugo Boumous-a shot ṭha zet Gurmeet Singh-a'n a dan pawh pui tak a ni.

Bagan an hlauhawm chhunzawm - mahse, Montenegrin defender Slavko Damjanovic chuan uiawm takin chance a hlah a, Hyderabad tana Javier Siverio hun erawh chance satliah a ni. Hun pek belh minute thumnaa Bagan midfielder Carl McHugh tauh luh loh erawh uiawm a tling.

A tawpah penalty

Minute 90 chhunga team pahnihin goal an khung loh avangin extra time khelh zui a ni a, hming langsar hmasa ber chu hun pek belha luhtir Mizo tlangval Lalrinliana Hnamte a ni.

Dungtlang tlangval, Chanmari aṭanga inzir chhuak midfielder hian extra time khelh aṭanga minute riatnaah uiawm takin a pet goal lo a, Hyderabad lam thin phu a rang.

Team pahnih hi an duh angin an innawr thei chuang lo - a tawpah penalty hmanga a chak zawk chinfel a ṭul a, Hyderabad-in pet hmasain Joao Victor chuan a chhuih goal nghal mah se Bagan keeper Vishal Kaith chuan Javier Siverio pet a dansak a, Ogbeche-a'n inringtawk taka a pet chuan post a per bawk!

Bagan tan Brendan Hamill chuan hlah ve mah se Pritam Kotal chuan a tawp khar nan a rawn chhuih goal a, league round-a beisei phak lo Bagan-in final an lut - football ropuizia kan hmu leh ta!

Vawi hnih

Semifinal first leg-a bul ṭantu Puitea'n mak takin second leg-ah bul a ṭan lo a, mi mak tih a hlawh - a tawpah erawh Puitea khelhna Bagan an chak ta tho a, Mizo midfielder hian season zawnin ISL final a lut.

Season hmasaa Kerala Blasters-in final an luh theih nana player pawimawh Puitea chuan, "Final vawi khat thlen pawh a harsat nen, Pathian leh ṭhiante zarah a zawnin ka lut ta reng mai - keipawhin a ropui ka ti," tiin Vanglaini a hrilh.

Puitea chuan, "Final hi chu beisei ruk, beisei ngam si loh a ni ber. Zanin bikah chuan kan khel ṭha zawkin ka hria. A tawp thleng khan tlang chance kan nei ve ve a, a vannei zawkah kan ṭang ta a ni," a ti.

Terina chuan, "Final luh chu a ropui dangdai a, kan tum ber la tihlawhtling lo mah ila, kan lawm khawp mai," a ti a, nomawi chawi chu an tum ber a nih thu Vanglaini a hrilh.