Napoli-in UCL quarterfinal an hnaih
Diego Maradona hoin Napoli-in Serie A nomawi vawi hnih an chawi tawh a, Europe inelna sang ber dawttu UEFA Cup nomawi an chawi tawh bawk. Mahse, Europe-a club inelna sang ber Champions League-ah erawh Napoli hian quarterfinal an la thleng ngai lo a, tun season hi an thlen hmasak ber tur a ni thei ang.
Napoli hian zanin dar 1:30 hian Eintracht Frankfurt an mikhual dawn a, khualmualah 2-0 a hnehna an chan avangin quarterfinal lut ngei tura ngaih a ni. Luciano Spalletti hote hian kar liam ta khan Atalanta 2-0 in an hneh a, point 18 zeta an fal tawh avangin Maradona hnua a vawi khat nan Serie A nomawi pawh a chawi ngei dawn.
A hming chu Osimhen
Deutsche Bank Park-a an inkhel hmasak ṭum khan Napoli tan Victor Osimhen-a'n goal hmahruai a khung a, Giovanni Di Lorenzo-a'n a khung belh leh bawk. Osimhen hi goal hmaah a hriam avangin Europe club lian ho chiltiputtu a ni pha.
Europe club zinga mahni league-a goal khung hnem berin ESM Golden Shoe an dawng ṭhin a, Osimhen hi point hmu sang pathumna a ni. Nigerian striker-in a tluk loh chu Erling Haaland leh Harry Kane te chauh a ni a, Osimhen hian goal 19 khung tawhin Kylian Mbappe leh Jonathan David te nen an khung zat a inang.
Napoli dinhmun a ṭha
Napoli hi Serie A-ah an dinhmun a ṭhat tawh avangin Spalletti-a'n sa huai a ser thei dawn. Chutihrualin Spalletti chuan, "Second leg a la awm tih kan hriat a ṭha a, kan tana hmelma lian ber chu quarterfinal lut tawha inngaih a ni," tiin a sawi.
Stadio Diego Armando Maradona-ah Napoli-in Osimhen thlawp turin Khvicha Kvaratskhelia an dahluh ngei a rinawm. Eintracht Frankfurt tlarhnung tan hna a tam dawn tih a hriat theih.
Frankfurt tana harsatna belhchhah turin first leg-a hnawhchhuah French forward Randal Kolo Muani chu hrem vangin a khel thei dawn lo. Mahse, Frankfurt coach Oliver Glasner a la beidawng lo.
Glasner chuan, "Chance kan la nei a, chance ṭha tak chu a ni miah lo a, mahse thil theih lo erawh a ni lo. Naples fang turin kan zin dawn lo a, chak tumin kan zin dawn. Goal kan khung hma theih chuan hlauhthawnna an nei nghal ang," tiin a sawi.