Man United-in Casemiro tel lo an tuar ang em?

Brazilian midfielder Casemiro chuan Southampton an hmachhawn ṭumin red card a hmu a, tun season-a vawi hnih red card a hmuhna a nih avangin match li a khel thei dawn lo. Casemiro hi March 19, Pathianni zana Man United leh Fulham ten FA Cup quarterfinal an khelh hunah a inlan thei dawn lo a; Newcastle United, Brentford leh Everton nen Premier League match an khelh hunah a khel thei lo bawk ang.

Man United hian League Cup final-ah Newcastle United an hneh a, chutihrualin an chak dan thlirin Casemiro tel loa St James' Park-a chak nawn hi a harsa dawn. Man United leh Newcastle te hi point ruk chauhin an inthlau a, Magpies hi match khata an khelh tlem bawk avangin an inkhel tur hi a la pawimawh hle.

Casemiro-a'n inkhel bul a ṭan hian Man United-in point an hmu tam zawk a, goal an chhuah tlem bawk. Hei hian Casemiro pawimawhna pholang a, chutihrualin Brazilian midfielder-in bul a ṭan loh hian Man United-in goal an khung tam zawk.

Ten Hag-a'n season tir lamah Casemiro hi ring lo mah se tun hnaiah a chhawr nasa a, Man United hian Premier League bakah Europa League leh FA Cup-ah inkhel pawimawh hmachhawn tur an neih avangin a awl ngai meuh lo. Tunah erawh Casemiro hi FA hnuai inelnaah a inlan thei dawn lo a, Brazilian midfielder hi Europa League-ah a insawrbing thei ang.

Man United hian Casemiro tel loin league match thum an lo khel tawh a, Leeds (vawi hnih) leh Leicester City laka point kua hmuh theih aṭangin point sarih an hmu a, point hnih chauh an hloh. Tun ṭumah pawh hian Casemiro tel loin result ṭha neih an tum leh dawn a ni.