A chung bera league round khartu BCA

Mizoram Super League champion lai Zarkawt BCA chuan MSL8-ah pawh league round an hmang ṭha hle, match 14 an khelh zawhah vawi 13 teh meuh hnehna chang chungin table hmahruaitu an ni tlang.

BCA hian Thawhṭan zan khan an league match hnuhnung ber an khel a, Aizawl khawpui pawn aṭanga team inlan thei awmchhun Champhai District BBA chu 115-58 in an hneh a, an kawngah harsatna an tawk lo tiin a sawi theih.

MSL vawi li champion tawh Zarkawt BCA coach Lalruatfela chuan, "A chung ber luahtu nih hi chu a lawmawm, chutih rualin awlsam taka tun dinhmun hi thleng kan ni bik lo a, hmabak hlen chhuah tur kan la ngah," tiin Vanglaini a hrilh.

BCA hian Khatla TBL lakah ṭum hnih hnehna an chang a, inkhel pahnihah hian an chak hram ve ve. Mission Veng Hotshots leh Bungkawn LB Associates an hnehna pawh point khat chauh a ni, chuvangin ngaihṭha taka awm thei an ni rih bik lo.

Inkhel dangah Chanmari Vikings chuan Mission Veng Hotshots 61-57 in an hneh a, table-ah palina an ni lailawk. Nizan khan Bungkawn LB leh Tuikual South an inkhel a, LB hi an chak a nih chuan Vikings nek chhuakin palina an ni ang.

MSL8-ah hian team pariat an inel, vawi hnih ṭheuh an inkhelh kual hnuah a sang pali ten semifinal an khel dawn a ni - ni zan khan league round an khel zo. March 16, Ningani zan aṭangin semifinal khelh chhunzawm leh tur a ni ang.