Last 16-ah Raducanu a lut

Emma Raducanu chuan nimin zing khan, world number 13 Beatriz Haddad Maia chu 6-1, 2-6, 6-4 a hnehin Indian Wells khelh laiah last 16 a inhlangkai, tukin dar 8:30 hian world number 1 Iga Swiatek nen an inhmachhawn leh ang.

British tleirawl Raducanu hian bul a ṭan fuh a, set khatna bikah a khingpui service vawi hnih a chhuhsak, set hnihna chu hloh mah se a pawimawh hun set hnuhnung berah dinhmun ṭha zawkah a ṭang leh ta a ni.

US Open 2021-ah khan khawvel barakhaihin Raducanu hi a champion, a hnu lamah erawh result a nei ṭha tawk lo. New York khawpuia hlawhtlinna a chan hnuah tun ṭum hi world number 20 chin a hneh lehna hmasa ber a ni hial.

Kum 20 mi Raducanu chuan, "Set hnihnaah khan ka khelh dan phung ka hloh deuh hman, ka tih ṭhat tawk loh bakah Beatriz khan a khel ṭha ve bawk. Set hnuhnung bera ka khelh dan erawh duhthusam a ni thung," a ti.

Inkhel dangah Iga Swiatek chuan US Open champion hlui Bianca Andreescu 6-3, 7-6 (7/1) in a hneh. Indian Wells-ah hian a kum zawna champion thei an awm khat hle, Martina Navratilova (1990 & 1991) hnuah Swiatek hian remchang a nei leh mek.

Polish nula Swiatek hian season a hmang ṭha, chak vek chu ni bik lo mah se match 15 khel tling player zingah chuan, set thum khelh ngai miah loa match la khel zo vek thei awmchhun a ni - Raducanu tan thil a awlsam dawn lo.

Swiatek chuan, "Ka khelh dan phung thlak ka tum lo, match khelh dan phung nghet tak ka neih chu chhawmnun ka tum zawk mai dawn a ni. Chutih rualin match hmasa aia hmasawn zel erawh a ngai," a ti a, a khingpui tur Raducanu hneh theih ngei a inbeisei.