Hliam vangin Pogba chawl rih dawn

Juventus midfielder Paul Pogba chu training an neihnaah a inhliam a, a hliam vang hian a rei lo berah chawlhkar thum tal a chawlh a ngai dawn niin Italian club chuan an tarlang.

Kum 29 mi Pogba hian Manchester United tana a contract a hman zawh hnuah Juventus a pan. Season thar inbuatsaihna an neih laiin a inhliam a, hmanni lawk khan a lo kir - match tam a khelh hmain a hliam leh ta a ni.

Kar hmasa khan a nungchang ṭha lo vangin Europa League lama Freiburg hmachhawn tur zingah telh a ni lo, kar tawpa Sampdoria an hneh ṭum erawhin hliam vanga inlan thei lo a nih thu sawi a ni thung.

Juve coach Massi-miliano Allegri chuan, "Zing karah Pogba hian freekick a pet a, vanduai thla takin a inti hliam zui. A hliam enkawl nghal a ni a, a lo kir leh thuai kan beiseiin dam thuai turin kan duhsak bawk," a ti.

Old Lady hian Ningani zanah Freiburg nen Europa League last 16 second leg an khel zui leh dawn, tun thla tawpah Inter Milan nen Serie A an khel leh bawk a, chumi hnuah chuan international break a awm zui dawn.

Juventus hi dan an bawhchhiat avangin Serie A point 15 an hmuhsa paihsak an ni a, tun season atan chuan Europa League hi nomawi an beisei theih leh beisei phak zinga hlu ber a ni. Season thara Champions League khel tura ticket neih awlsamna a ni bawk ang.

Pogba hian France tan Euro 2024 qualifying match hmasa lam a khel thei dawn lo. Group B-ah France hi an awm - March 24 hian Stade de France-ah Netherlands an mikhual dawn, ni thum hnuah Republic of Ireland nen an inkhel leh ang.