Premier League-ah dinhmun him lo an tam; Zaninah Southampton vs Brentford

Premier League table mawng-phaha awm Southampton chuan zanin dar 1:00 hian Brentford an mikhual dawn. Saints hi table mawngphaha awm ni mah se Bees laka hnehna an chang a nih chuan 16-naah an invawrhchho thei a, hei hian relegation battle boruak a 'hot' tih a nemnghet.

Inkhel dangah Brighton-in Crystal Palace an mikhual dawn a, Patrick Vieira kaihhruai Eagles hi 12-naah awm mek mah se an dinhmun a him bik lo. Seagulls (Brighton sawina) leh Bees te tan erawh tlak a hlauhawm lo a, season thara Europe inelnaa tel tum an ni thung.

United hnehtu Saints

Southampton-in an match hnuhnung berah Manchester United an hmachhawn a, Old Trafford-ah point khat hlu tak an hlawh chhuak - an vanneih ṭum ni se point thum hlawh chhuak thei tur an ni. Saints-in Erik Ten Hag-a hote laka point an hmuh avangin inrintawkna an ngah sawt ang. Mahse, Brentford nena league match hnuhnung pahnihah Bees hi 3-0 ve vein an chak a, St. Mary's Stadium-a inkhel tur ni mah se Saints tan point hmuh a harsa dawn.

Chutihrualin Southampton tlarhnung hi tun hnaiah a phui ṭha hle. Bees lakah Saints hi an clean sheet thei a nih chuan January 2021 hnua a zawna league match vawi thum an clean sheet lehna hmasa ber tur a ni.

Saints hian result ṭhat tawk loh avangin manager Ralph Hasenhüttl leh Nathan Jones te an ban tawh a, tuna team enkawltu Rubén Sellés hian February 24 aṭangin enkawl ṭanin match hmasa berah Leeds hneh loh mah se Leicester City leh Manchester United lak aṭangin point li an hlawh chhuak.

Southampton hi Selles hnuaiah an insiam ṭha chho hret hret a, Premier League inham tang turin beiseina thar an nei leh ta. Premier League table thlirin 11-naa awm Aston Villa chuan point 35 an hmuh tawh avangin an him turah a ngaih theih a, 12-na china awmte erawh tla thei vek an la ni.

Crystal Palace, Wolves, Nottingham Forest, Everton, Leicester City, West Ham United, Bournemouth, Leeds United leh Southampton te aṭangin pathum tla turah a ngaih theih a, match 12 khelh tur a la awm avangin tla tur hi hriatthiam a la har hle.

Brighton Vs Palace

Brighton hian Premier League bika Crystal Palace an hmachhawn hnuhnung pasarihah chak an nei lo a, vawi nga an inhnehtawk a, vawi hnih an inhnehtawk. Seagulls hian an record duhawm lo hi an mual Amex Stadium-ah ngei thaichhiat an tum ang.

Palace hi kuminah an la che ṭha lo a, kumin bika league match vawi 10 an khelhah chak an nei lo. Vieira hote hi vawi nga an chak a, vawi nga dangah an inhnehtawk. Kum 2016 hnua chak nei loa an kal zawn rei ber ṭum a ni.

Premier League bikah club pahnih hi vawi 11 an inhmachhawn tawh a, Brighton hi vawi hnih chakin Palace hi vawi thum an chak a, vawi ruk an inhnehtawk. Eagles hi an record ṭha hret mah se Seagulls muala inkhel tur an nih avangin Roberto De Zerbi hote hi an buk a rit zawk.

Brighton hian FIFA World Cup nomawi chawi thei Alexis Mac Allister an kawl a, Argentine midfielder hian match hnih a zawnin goal a khung tawh a, Palace tan ven uluk a ṭul dawn. Chutihrualin Palace forward Wilfried Zaha hian Brighton hi a ngam a, inelna hrang hrangah Seagulls lamah goal riat a khung tawh a ni.