An mualah Warriors an hrang

Klay Thompson-a'n point 38 a neih zinga 33 zet chu first half-ah a nei a, guard Stephen Curry chuan point 23 bakah assist vawi nga neiin rebound ṭum sarih a la bawk - nimin zing NBA regular season inkhelah Golden State Warriors chua Phoenix Suns 123-112 in an hneh.

Chase Center hi chu team dang tana lenluh chakawm lohna tak a ni, tun hnaiah Warriors hian an mikhual team pasarih chu an hneh vek. Western Conference-ah pawh pangana niin an dinhmun an siamṭha leh tawh hle.

Suns tan Kevin Durant a inlan thei lo, kerek hliam vangin a zawnin match thum a chawlh a ngai ta. Inkhel ve lo mah se GSW fans lamin Durant an au el tho a, tun hma lama champion pui tawhtu hi an lawm tehchiam lo.

Warriors coach Steve Kerr chuan, "Fans thawm kha ka hria, thil mak a ni hran lo," a ti. Golden State hian Ningani zingah Los Angeles Lakers an lenchilh leh nghal dawn, khualmuala result an neih ṭhat tawk loh siamṭhatna hun a ni ang.

Nimin zing inkhel dangah Milwaukee Bucks chuan 133-124 in Sacramento Kings an hneh, hnehna an chan theih nan hian an thiampuipa Giannis Antetokounmpo chuan point 46 a nei.

NBA Most Valuable Player vawi hnih ni tawh hi tun hnaiah banrek hliam vangin vawi thum a inkhel thei lo a ni, a hliam a dam a nih chuan Bucks tan innghahna tlak a ni a, team dang tan hmachhawn chakawm lo an ni thung.

Bucks hian Eastern Conference-ah hma an hruai mek, match 49 chak tawhin ṭum 19 an tlawm thung. An elpui Boston Celtics chu rin loh tak maiin Western Conference mawngphah luahtu Houston Rockets lakah 111-109 in an chak lo thung a ni.