AC Milan an chak zo lo

Serie A champion lai AC Milan chuan a mawng lama talbuai Salernitana an mikhual a, 1-1 in an inhnehtawk. Stefano Pioli naute hian pahnihna Inter Milan nena point inzat neih theihna remchang ṭha chu an bawhpelh a ni.

Thawhṭanni zan San Siro-a inkhelah Milan tan striker Olivier Giroud chuan chawlhlawk hma chiahin goal a khung a, second half-ah mikhual Salernitana tan Boulaye Dia chuan si phurh a sut ve thung.

Second half tir lamah Giroud-a'n yellow card a hmu, season kal laia vawi nga a hmuhna a nih avangin match khel khel thei lo tura hrem a ni dawn, card a hmuh hnu lawkah Pioli chuan la chhuakin Zlatan Ibrahimovic a dah lut.

Milan tan defender Alessandro Florenzi leh striker Ibrahimovic ten chakna goal khung theihna remchang nei mah se an hlawhtling lo a, point khata an lungawi a ngai - Serie A title an kawl lai humhim a harsa tawh khawp ang.

AC Milan coach Stefano Pioli chuan, "Holam taka goal kan chhuah fo a nih chuan thlen san a harsa ang, chuvangin tun aia fimkhur leh ṭha zawk khan kan khel thei a ni tih kan hriat a ngai, chutih rualin goal dang kan khung belh lo kha kan vanduai ve bawk.

"Olivier Giroud ka thlak avangin zawhna ka dawng nual, kha chu thil mak a ni hran lo. Goal chu a khung ngei a, mahse ni dang angin a khel ṭha tawk lo," tiin Giroud la chhuaka Ibra a dah luh chungchang a sawi bawk.