India player-ten beisei an nei

Badmiton inelna ngaihhlut zinga mi All England Open chu tun kar chhung hian Birmingham khawpuiah khelh a ni dawn. Indian player ṭhate chuan hun rei tak hnuah title lak ve leh theih ngei an inbeisei.

Kum 2001 khan Pullela Gopichand a champion - Gopi hian Prakash Padukone champion aṭanga kum 21 hnuah nomawi a chawi. Tunah chuan Gopi hi India chief coach a ni tawh, nomawi a chawi aṭangin kum 22 zet a liam leh tawh a, Indian shuttler zingah champion thei an la awm leh rih lo.

Saina Nehwal chu 2015 khan pahnihna a ni a, a champion teuh hle. Season hmasa khan Indian tlangval Lakshya Sen chuan final a lut ve leh a, mahse world number 1 Viktor Axelsen hneh loin pahnihnaah bawk a tawp.

Kuminah hian tawnhriat nei ṭha Saina Nehwal hi a inhnukdawk, hmeichhe singles lamah chuan PV Sindhu chauh India tana inlen thei tur a ni dawn, a match hmasa bera atan Chinese player Zhang Yi Man nen an inhmachhawn ang.

Olympic medal vawi hnih dawng tawh Sindhu kalkawngah hian, seeded pangana He Bing Jiao leh Tai Tzu Ying te an awm thei dawn a, semifinal thlen hmain player ṭha tak tak a hmachhawn thei dawn.

Mipa singles lamah HS Parannoy chu India beiseina a ni dawn, ani hian Chinese player tho Wang Tzu Wei hmangin bul a ṭan dawn, a chak a nih chuan Indonesian shuttler Anthony Ginting a hmachhawn leh thei dawn a ni.