Wawrinka chak laiin Murray chak lo

Grand Slam vawi thum champion tawh Stan Wawrinka-a'n Indian Wells khelh mekah last 16 a lut a, amah ang bawka major title pathum la tawh Andy Murray erawh Jack Draper hneh loin a zinkawng a tawp thung.

Nimin zing inkhelah Stan Wawrinka hian seeded pasarihna seed Holger Rune chu 2-6, 7-6 (7-5), 7-5 in a hneh a, vawiin chawhma lam hian Italian tlangval seeded 11-na Jack Sinner nen an inhmachhawn leh dawn a ni.

Swiss star Wawrinka chuan, "Inkhel awlsam tak chu a ni lo, a bik takin a tawp lam minute 45 chhung kha a harsa hle. Tennis ka khelh hun chhung hian a awlsam aiin harsa ka tawng hnem, chuvangin a paltlang dan ka hria," a ti.

Grand Slam vawi thum champion tawh Murray erawhin Draper chu 7-6 (8-6), 6-2 in a ngam lo. Kum 21 mi Draper hian US Open champion lai Carlos Alcaraz a tum leh dawn, a hmabak chu a hautak tawh khawp ang.

Spanish tlangval Alcaraz hian inkhel dangah Tallon Griekspoor a hneh, tun ṭumah hian a champion thei a nih chuan world number 1 Novak Djokovic nek chhuakin ranking sang ber dinhmun a luah thei dawn.

Inkhel dangah cham-pion lai Taylor Fritz chuan Sebastian Baez 6-1, 6-2 in a hneh. Seeded palina Fritz hian aces vawi li a siam a, a service hmasa aṭangin 80% lai point a hmu bawk, a service ṭha chu a chak theih chhan a ni.