Leipzig tan Man City an ṭha mah mah
Manchester City-in Erling Haaland hoa Champions League nomawi chawi an tumna chu an chhi nung zel a, Thawhlehni zan khan RB Leipzig chu 7-0 in an sawp. Pep Guardiola hote hi first leg-ah an chak zo lo a, Red Bull Arena-ah 1-1 in inhnehtawk mah se Eithad Stadium-ah team ṭha zawk chungnunna a lang.
Norwegian striker Haaland-a'n goal nga lawih a khung a, Ilkay Gundogan leh Kevin de Bruyne-a'n goal khat ve ve an khung bawk. Man City tan De Bruyne che ṭha hi chanchin lawmawm a ni a, KDB hian goal class bik a khung avangin inrintawkna a nei lei dawn. City-in UCL, Premier League leh FA Cup te an champion dawn a nih chuan De Bruyne chet ṭhat hi a pawimawh hle.
Goal sarih chhuahtu Leipzig hian defender ṭha Josko Gvardiol an kawl a, Croatian defender hi City-in nipui bazarah lak an tum. Chutihrualin Gvardiol hian release clause a nei lo a, Chelsea leh Liverpool ten an duh bawk avangin goal sarih ngawt chhuah mah se a man a to tho ang.
VAR Duhsakna
Man City-in goal sarih ngawt an khung a, chiang takin chak mah se goal khatna khung turin referee Slavko Vincic duhsakna an dawng. Rodri ball tauh chuan a zuan ruala zuang Leipzig defender Benjamin Henrichs kut ta tauh per (thawi) a, referee Vincic-a'n mual sira monitor a en hnuah penalty a pe.
Referee thutlukna sawiseltu an ṭhahnem a, Man City-in goal sarih ngawt an khung avangin sawiselna hi a ri ring lo zawk. Chutihrualin Man City hian penalty hi hmu lo ta se awlsam takin an chak kher lo ang. Mahse, ball-in a kut a fuh miau a, box chhunga ball-in kut a fuh chuan dan hmang chuan penalty a ni miau si!
Haaland goal nga
Haaland-a'n hun ṭha a bawhpelh lo a, minute 22-naah goal sirah kawh zetin a pet goal. City inkhel a hmuhnawm a, minute 24-naah KDB-a'n kawh zetin crossbar a pet per a, hemi per hi Haaland-a'n a tauh goal. Norwegian striker goal khung awlsam hmela lang, harsa si a ni. Haaland hian ball a zawng a, laklawh a nei lo a, tauh lut turin a lenna hmang ṭangkai bawk.
First half injury time-ah Ruben Dias-a ball tauhin goal ban a per a, hemi per Leipzig midfielder Amadou Haidara-a'n goalline aṭangin pet chhuak mah se Haaland-a'n a dang hman. Haaland-a hattrick siamna goal hi 'goal class' chu a ni hauh lo a, amaherawhchu player tam takin nachang an hriat lohna turah awmna tur a thlang thiam tlat.
Second half ṭan deuh chiahah Gundogan-a'n goal mawi a khung a, City player-te goal hmaah an hriam a, an vannei tel bawk. Minute 53-naah Haaland-a'n a khung leh a, Leizpig player-ten ball an pet chhuah theih loh avangin hnai tak aṭangin chiang takin a khung. Minute li hnuah Haaland-a'n a hmaa mi ang deuh thoin a pet goal leh a, goalkeeper Janis Blaswich dan per chu kawh zetin a pet lut.
Goal nga a khung hnuah Haaland an thlak zui a, City-in pet goal thei ber an thlak avangin mualneituin goal khung an harsat tawh. Injury time-ah KDB-a'n box pawn chiah aṭangin mawi zetin a hlai goal a, second leg-ah City 7-0 in a chak.
Goal khung tura piang Haaland
Manchester City striker Erling Haaland-a'n goal khung a bansan thei lo a, Champions League last 16-ah meuh goal nga a khung.
Norwegian striker Haaland hian nikum nipui bazarah Man City a zawm a, Pep Guardiola hote hi possession football khel niin player tinin ball an chang tam hle. Haaland erawhin ball a chang tam ṭhin lo a, sawisel tawk pawh an awm.
Nikum September thla khan Haaland chuan, "Ka
duhthusam chu ball vawi nga chauh khawih a, goal nga khung a ni. Tih hlawhtlin ka châk ber zinga mi a ni," tiin a sawi nghe nghe.
Amaherawhchu ball vawi nga chauh khawih a, goal nga khung chu tih theih loh tluk a ni. Chutihrualin goal nga khung hrim hrim erawh Haaland-a'n a ti hlawhtling a, Norwegian striker hian ball vawi 30 a khawih thung.
Haaland chuan, "Ka chhuah chiah khan Pep Guardiola bulah, 'Double hattrick siam ka duh,' tiin ka hrilh. Mahse tih theih dang ka nei lo," tiin a sawi. Pep Guardiola hian Haaland hi minute 63-naah a thlak a, Norwegian striker hi la chhuak lo se goal a khung ngei pawh a rinawm hle.
Inkhelh banah Guardiola a insawifiah. Man City boss chuan, "Kum 22 mi chauh nichunga UCL match khata goal ruk a khung a nih chuan hmalam hunah chona hmachhawn tur a nei lo ang a, inkhelh tuina a reh palh ang," tiin a sawi.
Haaland hian goal a khung thei tih a chiang a, Norwegian striker leh goal sawi zawm hi a inrem tawh. Chutihrualin Haaland leh nomawi hi thil inrem tak la ni rih lo a, tun season-ah pawh City hi treble champion thei ni bawk mah se nomawi chawi lo vek thei an ni tho.
• UCL match 25 aṭangin goal 31 a khung. Mahni mualah phei chuan Haaland hian match 12 lek aṭangin goal 22 a khung.
• Tun season-a hattrick vawi nga a siamna a ni.
• Record : UCL-a goal 30 tling thei rang ber a ni a, match 25 chauh a mamawh.
• Record : UCL-a goal 30 khung thei naupang ber a ni a, kum 22 leh ni 236 mi chauh a ni. Haaland hian Kylian Mbappe record (kum 22 leh ni 352) a khum.
• Record : Haaland hian goal nga khung turin minute 57 chauh a mamawh. UCL-a goal khung dang pahnih Luiz Adriano vs BATE Borisov (82 mins) leh Lionel Messi vs Leverkusen (84 mins) te aiin hun a mamawh tlem zawk a, goal nga khung tura hun mamawh rei lo ber a ni.
• Record : Haaland hian tun season inelna hrang hrangah match 36 khelin goal 39 a khung a, hei hi Man City record a ni. Norwegian striker hian assist vawi nga nei tawh bawkin tun season City goal 44-ah a inrawlh.