Arsenal tan goal khung a ngai

Zanin dar 1:30 hian Arsenal chuan Sporting Lisbon an lo mikhual dawn. Europa League last 16 first leg-ah team pahnih hi 2-2 in an inhnehtawk, quarterfinal lut tur chuan Mikel Arteta naute tan goal khung ngei a ngai.

Premier League hmahruaitu Gunners hian tun kar tawpah Crystal Palace an mikhual zui dawn. Europa League quarterfinal luh an duh dawn a, chutihrualin league an ngaihpawimawh avangin player an siksawi thoin a rinawm.

Jesus a lo kir

Gabriel Jesus-a'n Fulham a hmachhawn thei tawh a, match fitness a neih nan zaninah minute tam zawk a khel a nih pawhin a mak lo ang. An match hnuhnung berah chak chiang viau mah se player a siksawi tam lo.

Spanish manger Arteta-a'n EPL lama player a siksawi lo kha Europa League a ngaihtuah vang nia sawi a ni. Midfielder Jorginho leh Emile Smith Rowe ten hmun an chan a rinawm a, khualmuala che ṭha tawk lo Fabio Vieira pawhin hun ṭha a nei nawn mai thei.

North London club hian defender Gabriel an chawr rim a, first leg-ah khan an hahchawlhtir. Brazilian defender hi an chawlhtir nawn a nih pawhin Rob Holding an nei a, a sirah Ben White aiin Takehiro Tomiyasu kan hmuh a rinawm bawk.

Arsenal tan goal venhim chauh ni loin, a nawr kawngah pawh Oleksandr Zinchenko a ṭangkai ṭhin. Mual sira khel thiam Zinchenko aiah Kieran Tierney chu lut thei a ni a, inkhelh tam duh Tierney tan a theihna lan chhuahtirna hun ṭha a ni thei bawk ang.

Fimkhur a ngai

Arsenal hian Portuguese team an mikhual vawi kuaah ṭum khat chiah chak loh an nei, 1992 khan Benfica 3-1 in an hneh lo - a dangah erawh tlawm an nei miah lo, zaninah pawh rinkai ni chungin an inlan dawn.

Mahse, Gunners hi chak chiang tia sawi ngawt theih an ni lo. Sporting Lisbon khelmualah goal an khung hmasak an hum thei lo a, zaninah pawh tlarhnung an siksawi kual a nih chuan Portuguese club tan goal khung theihna remchang a awm leh ang.

Sporting hian hrem vangin captain Sebastián Coates leh midfielder Hidemasa Morita te an chhawr thei dawn lo, an squad a chhah bik loh avangin coach Ruben Amorim tan an hmunruak hnawhkhahna tur a vang va mai thei.

Amorim-a naute hian inrintawkna an neih belh nan, an league match hnuhnung berah Boavista chu 3-0 in an hneh, goal thum ngawt an khung bakah an tlarhnung a phui avangin Emirates Stadium tlawh turin an inringtawk ang - hna erawh a awlsam dawn lo.