India tana inlan tur Lianzuala

Hero Tri-Nation International Football Tournament khelh tur atan India coach Igor Stimac chuan squad a puang a, player 23 koh zingah Mizo player Lallianzuala Chhangte chu a tel.

Mumbai City forward Lianzuala Chhangte hian ISL final-ah a team hruai thleng ta lo mah se tun season inelna hrang hrangah (ISL & Durand Cup) Mumbai tan match 29 khelin goal 17 a khung a, assist vawi kua a nei.

Durand Cup-ah hian top scorer niin goal sarih a khung a, ISL-ah pawh goal 10 khungin, ania aia goal khung hnem zawk Indian player zingah an awm lo. Mumbai tan Lalengmawia Ralte (Apuia) chuan season ṭha tak hmang mah se tun hnaiah a inhliam a, India squad-ah a awm lo.

Khuman Lampak Stadium, Imphal-ah Hero Tri-Nation inelna hi khelh a ni dawn a, March 22-28 inkara khelh tur niin, Blue Tigers bakah Myanmar leh Krygyz Republic chuan inelna hi an hmachhawn dawn a ni.

Player koh 23 zinga 14 chuan nimin khan Kolkata-a India camp an zawm nghal a, player dang pakua erawh ISL final khel tur ATK Mohun Bagan leh Bengaluru FC player an nih avangin India squad hi an la zawm rih lo.

ISL final hi March 18, Inrinni zanah khelh a ni dawn a, Blue Tigers tana inlan tura koh player pakua hian March 19-ah India squad hi an zawm nghal dawn a ni.

Tuna India squad puan hi provisional squad tih a ni a, India tan an inlan ngei dawn tih a la chiang lo. ISL final zawhah squad tak tak hi puan tur a ni a, hetihrual hian player 23 koh sa an nih avangin hliam vanga thil thleng thei laka inven nan provisional squad an ti mai niin a lang.