An ropuina nen Tuikual South an her liam

Tualchhung basketball a nih chuan mitthlaah Tuikual South an lo lang ṭhin, inelna sang Mizoram Super League neih ṭan a nih aṭanga la inlan char char Phengphehlep chu MSL aṭangin an tla, season tharah an hmel kan hmu thei dawn lo.

MSL8 league round khelh zawh a ni a, match 14 an khelh chinah Tuikual South hi parukna an ni. TKS leh Khatla South Barons te an tla a, district quota aṭanga tling Champhai District BBA chu an zinkawng a tawp bawk.

Mizoram Basketball Association hnuaia MSL Board inkaihhruaina danah, district aiawh pakhat zelin MSL khelh theih a ni - an champion a nih chuan tla loin an awm tlang ang, champion loh erawh chuan season tin qualifying khelh a ngai.

District aiawhin Champhai an tling a, pasarihna an ni. Anni chhiar tel loa team hniam pahnih kha an tlak a ngai, chuvangin parukna Tuikual South tan inhamtan theih a ni ta lo - season tharah chuan Nursery Sporting Club leh VR4 kan hmu thung ang.

MSL an khelh ṭantirh aṭanga Tuikual South captain F. Zodinthara chuan, "Kum 2014 khan team kan din a, playoff aṭangin MSL khel turin kan tling. Hun harsa leh hrehawm tam tak pawh kan paltlang ve bawk, chumi kartah chuan basketball vanga hlimna kan tawng hnem.

"A nihna tak sawi chuan MSL aṭanga tlak chu rilru a na, mimal tak pawhin ka hma hun tur ka la sawi thei rih lo," tiin Vanglaini a hrilh a, a vanglaia Mizo player hmuhnawm berte zinga mi hian basketball chawlhsan erawh a la tum rih lo.

MBBA Season Opeing Tournament-ah Khatla South Barons an champion a, inelna lian MSL-ah Mizo hlangin an khel, chak nei loin an tla. Tuikual South pawh hi nikum kum tawp lama khelh MBBA Cup champion an ni a, ropui zawka lo kir leh an tum ang.