World Cup 2026: FIFA-in kalphung a thlak

Football khawvela thuneitu sang ber FIFA chuan World Cup 2026-a group pakhat zela team pathum awm tura a lo ruahman tawh chu a thlak danglam a, World Cup dang ang thoin group tinah team pali zel an awm dawn.

United States, Mexico leh Canada-in an inthlen ṭawm tur World Cup-ah hian team 32 inel ṭhin chu ram 48-ah tihpun a ni dawn a, hei vang hian ruahmanna hmasaah chuan, group stage-ah group 16 awmin, group tina team pathum awm tura tih a ni.

Mahse, Rwanda-a FIFA Council ṭhukhawm chuan an ngaihdan hi thlakin, World Cup 2026-ah hian group tina team pali zel awm turin an ti leh ta zawk a, group 12-ah ṭhen an ni dawn tihna a ni. World Cup 2022-a group tina team pali dah hlawhtlinna chuan FIFA hruaitute hi an thutlukna awm tawh sa a ṭhiahtir niin khawthlang media-te chuan an tarlang.

FIFA-in thutlukna thar an siam leh takah chuan, World Cup 2026-a match 80 khelh tur awm tura chhut chu match 104-ah a pung chho. Group tina a ti ṭha pahnih leh pathumna zinga a ti ṭha zual pariatin last 32 an lut ang.

World Cup-ah hian group stage aṭangin last 16 khelh ṭhin a ni a, mahse, 2026-ah erawh team an pun tawh dawn avangin knockout round chu last 32 aṭanga khelh a ni tawh dawn a ni.

FIFA president Gianni Infantino chuan December khan 2026-a group stage-a team ṭhen dan tur chu an ngaihtuah ṭhat tur thu a lo sawi tawh a, group stage tawp lam boruak sang khan a lung a dum viau niin a lang.

World Cup 2022-ah khan champion tura match khelh ngai zat chu match sarih a ni a, World Cup 2026-ah erawh champion turin match riat khelh a ngai tawh dawn thung.

FIFA chuan 2025-2030 inkara mipa international match calendar chu an pawm bawk a, he calendar thar an pawm aṭanga a lan dan chuan July 19, 2026, Pathianniah World Cup final khelh a ni dawn.

World Cup-a khel tur player-te chu club-ten May 25, 2026 aṭangin an chhuah zalen ṭan a ngai dawn a, May 24, 2026-ah club official match hnuhnung ber khelh tur niin, khawmualpui inelna (Champions League etc) final khelte erawh May 30, 2026 thleng hriatthiam tur an ni - FIFA phalna an lak phawt a ṭul thung.

Hmeichhe inter-national match calendar chuan kum khatah international window vawi ruk a nei dawn a, an calendar hian July 25 - August 10, 2024-a neih tur hmeichhe Olympic football tournament pawh a huam tel a ni.