Wawrinka tlak laiin Alcaraz a chak

Carlos Alcaraz chuan world number 1 dinhmun luah leh turin kawng dik a zawh. Spanish rawlthar hian nimin zing khan Jack Draper chu 6-2, 2-0 a hnehin Indian Wells quarterfinal a lut.

Court 1-a inkhelah minute 46 chauh an inhmachhawn hman a, dul hliam vangin Draper hi a inkhel zui thei tawh lo. Match hmasa lama Andy Murray a hneh ṭumin a hliam tawh a, service a harsat - Alacaraz hmachhawn lui mah se a inkhel tluan thei ta lo a ni.

World number 2 Alcaraz chuan, "Ka ball vuak leh dawnsawn dan zawng zawngah sawisel tur ka nei rih lo, inrintawkna sang zawk nen quarterfinal ka khel ang," a ti, quarterfinal-ah chuan Tommy Paul hnehtu Felix Auger-Aliassime a hmachhawn leh ang.

Inkhel dangah Stan Wawrinka chu Jannik Sinner lakah 6-1, 6-4 in a chak lo. Kum 37 mi Wawrinka hian tun hnaiah khel ṭha viau mah se, seeded 11-na Sinner lakah erawh a service vawi li ngawt hlohin a ṭang zo ta lo a ni.

Italian tlangval Sinner hian vawiin chawhma lam hian champion lai Taylor Fritz a hmachhawn leh ang. Player pahnih hi tun hmain vawi khat an lo intawng tawh, 2021 October thla khan BNP Paribas Open-ah Fritz hi straight set hmangin a chak.