A thiam pariat zingah Inter Milan an tel

Inter Milan chuan Porto khelmualah goal khung lo mah se Champions League round of 16 an paltlang a, European football-a club thiam zual pariat zingah an tel.

Thawhlehni zan khan Inter hian khualmualah Porto an lenchilh a, 0-0 in an inhnehtawk. Mahse, first leg-a 1-0 a an lo chak tawhna chu Italian club hian an chhawr ṭangkai a, inkhel pahnih belhkhawmah chak zawk ni chungin quarterfinal an lut.

Porto defender Pepe chu hun pek belhah a yellow card pahnihna a hmuh avangin hnawhchhuah a ni - he Pepe hi card hmuh hrat tak Pepe kha a ni lo tih erawh hriat a ṭha. Porto hian defender tawnhriat nei ṭha, Real player hlui Pepe kawl mah se Inter lakah hian a inlan lo.

Team pahnihin goal khung lo mah se inkhel hmuhnawmna erawh a bo phah lo a, team pahnihin chance an nei fo - Italian club-in an tlang theih chhanah lawmthu hrilh tur an nei a nih chuan goalkeeper Andre Onana a ni ngei ang.

Inter chhantu Onana

Champions League round of 16 first leg-a team pahnih an intawn ṭumin Inter-in 1-0 in hnehna an chang a, Romelu Lukaku chuan minute 86-naah inkhela goal awmchhun a khung.

Inter-in hei hi an hre ran a, coach Simone Inzaghi chuan 3-5-2 formation rawn hmangin, tlarhnung ven a ngaipawimawh. Porto-in an tan goal khung a ṭul tih an hai bik lo a, 4-2-3-1 rawn hmangin, fimkhur takin an nawr.

Mahse, hming langsar ber erawh Inter si ban inkara ding Onana a ni a, Cameroonian keeper hian Porto khelmualah 'a changtupa' dinhmun a luah a, hamrik tawp thlengin a nghing lo.

Porto tana Mateus Uribe-a'n yard 25 vela hla aṭanga a 'shot' Onana dan phei chu pui tak a ni a, Marko Grujic pawhin goal khungna remchang nei mah se lo dang chattu chu Onana bawk a ni.

Porto an vanduai

San Siro-ah goal khat chiah an chhuah a, goal khung ve lo mah se mahni mualah a 'comeback' theih tih a chiang - mahse, Porto vanneih zan a ni lo em ni chu aw, tih mai tur a ni a, Onana khelh ṭhat bakah an vanduai ve hrim hrim bawk.

Iranian forward Mehdi Taremi pawhin chance duhawm a nei a, mahse, tun season-a match 39 a khelh aṭanga goal 22 khung tawh forward hian a hming chherna remchang a neih chu a chhawr thei lo.

Kum 30 mi Taremi hian hun pangngaiah uiawm taka chance a hlah bakah, hun pek belhah post leh bar a tih per a, Champions League-a goal nga a khung tawh chu a belhchhah thei lo - a ui khawp ang.

Brazilian forward Evanilson-a chance neih chu a hun takah Federico Dimarco chuan a tibuai hman a, Canadian midfielder Stephen Eustaquio-a'n cross ṭha zet a tlawh hman lo pawh a ui khawpin a rinawm - Porto an vanduai.

Inter an vannei

Porto tan Uribe chuan second half-ah a volley over a, Denzel Dumfries-a'n goal line aṭanga ball a lo petchhuah hmante chuan Inter vanneihzia a hrilhfiah.

Inter tan chance duhawm bera chhal ngam chu Edin Dzeko bulah a tla a, mahse, a khung thei bik lo - hun tawp thlengin goal a awm lo a, Italian club-in quarterfinal an lut.

Champions League quarterfinal-ah Benfica, Chelsea, Bayern Munich, AC Milan, Inter Milan leh Manchester City an lut chiang ta a, nizana inkhel Napoli vs Eintracht Frankfurt, Real Madrid vs Liverpool aṭangin team pahnih an lut leh ang - result kan hre hman lo.

European football club inelna sang ber quarterfinal-a intum turte hi UEFA hmunpui Nyon, Switzerland-ah Zirtawpni, tlai dar 4:30-ah pawh a ni dawn a ni.