Spain, Portugal leh Morocco ten World Cup thlen duh

Morocco chuan Spain leh Portugal te thlawpin 2030 FIFA World Cup thlen an duh a, anni bakah hian Russia nena buaina nei lai Ukraine chu an dinhmun a chiang thei rih lo mek bawk.

Ukraine hian nikum October thla kha a thuphung chuan Spain leh Portugal te nena World Cup thlen hi an lo thlawp tawh. Mahse, Russia nen an indo mek avangin Ukraine Football Association chuan thu mum an nei thei rih lo.

Morocco lal chhung-kua aṭanga seilian, tun dinhmuna an ram lal ni mek Mohammed VI chuan, "Morocco chuan Spain leh Portugal te nen World Cup 2030 a inṭawma thlen dil kan duh.

"Keini pathum hian kan inthlen ṭawm thei a nih chuan football chanchin danglam tak a ni ang. Africa leh Europe khawmualpuiin kan thleng kawp thei dawn tihna a ni. Tawnhriat leh ruahmanna hrang hrang thlirin World Cup ṭha ber a ni thei ang," a ti.

World Cup 2030 hi South American ram pali - Argentina, Chile, Paraguay leh Uruguay te pawhin inthlen ṭawm an duh a, football thuneitu sang FIFA hnenah dilna an thehlut tawh - World Cup kum 100 tlinna a nih dawn avangin South American ramte hian an beisei a ni.