Europa League quarterfinal lut tur a chiang dawn

Zanin hian Europa League last 16 second leg chu khelh a ni dawn. First leg-ah club lian zawk zel an che ṭha a, amaherawhchu inkhel hi minute 90 ni loin minute 180 tur a nih avangin eng result pawh la thleng thei a ni.

Manchester United chuan zanin dar 11:15 hian Benito Villamarín-ah Real Betis an hmachhawn dawn a, Old Trafford-ah 4-1 a hnehna an chan tawh avangin quarterfinal lut turin an dinhmun a ṭha. Juventus pawhin Freiburg an tlawh dawn a, Italian club hi an mualah 1-0 in an chak tawh.

Europa League-a nomawi chawi thiam bik, Sevilla pawhin first leg-ah Fenerbahce 2-0 in an hneh. Spanish club hian Europa League nomawi vawi ruk an chawi tawh a, club hming ena hrawl ber ni lo mah se record nei ṭha ber an ni. Zanin dar 11:15 hian Sevilla hian Sukru Saracoglu-ah Fenerbahce an hmachhawn ve bawk ang.

Nomawi pathum

Manchester United-in nomawi pali an la chawi thei a, League Cup nomawi chawi tawh mah se kartawp khan table mawngphaha awm Southampton nen an inhnehtawk avangin Premier League erawh beisei ngam chi a ni ta lo. Chutihrualin Erik ten Hag-a hote tan FA Cup leh Europa League hi la beisei ngam a ni a, Real Betis lakah an theihna an pholang ang.

Saints laka hnawhchhuah Casemiro-a'n Europa League-ah bul a ṭan ngei a rinawm a, match li khel thei lo tura hrem Brazilian midfielder hi Ten Hag-a'n Europa League-ah rim takin a chhawr ang. Man United hi first leg-a an chet ṭhat avangin an dinhmun a ṭha a, mah se tun hma thil thleng an thlir let erawh chuan an fimkhur a ngai.

1963-64 season khan Sir Matt Busby kaihhruai Man United chuan an mualah Sporting chu 4-1 in an sawp a, chak turah inngai tawh mah se Lisbon-ah 5-0 in an chak lo a, European Cup Winners' Cup quarterfinal-ah an tla.

Alonso tan nomawi?

Europa League knockout playoff first leg-ah Monaco-in Bayer Leverkusen chu an mualah 3-2 in an hneh lo a, second leg-ah 3-2 in an hneh let. German club hi penalty shootout hmangin an chak.

Tun ṭumah hian Xabi Alonso kaihhruai Leverkusen hian an mualah Ferencvaros chu 2-0 in a hneh tawh a, quarterfinal lut turin an dinhmun a ṭha. Liverpool leh Real Madrid midfielder hlui Alonso hian ama puala senior team a enkawl hmasak berah hian nomawi a chawi thei tlat. Chutihrualin Leverkusen tan nomawi chawi tur chuan kalkawng a la thui hle.