Nottingham hmaa ding tur Newcastle

Zanin dar 1:30 hian Premier League aṭanga tlak hlau Nottingham Forest-in City Ground-ah Newcastle United an mikhual dawn. Magpies hi table-ah panganaah an awm mek a, chutihrualin an chunga awm Tottenham aia match hniha an khelh tlem avangin season thara Champions League khel turin club dang result-ah an innghat lo.

Eddie Howe hote hi chak tur zawka rinkai an ni a, chutihrualin Forest hi khelh an harsa dawn. Steve Cooper hote hi an chak lo a nih chuan relegation zone-a awm thei an ni a, City Ground-a khel tur an nih bawk avangin chak hmel an hmu thei lo a nih pawhin point khat tal an beisei ang.

Inhliam leh hrem

Newcastle hian January thlaa an lakluh Anthony Gordon chu ke rek hliam vangin an chhawr thei dawn lo a, Gordon hi Man City an hneh loh ṭumin an inhliam. Hrem vangin midfielder pawimawh Joelinton a khel thei dawn lo a, tun season-ah yellow card 10 a hmuh tawh avangin match hnih khel thei lo tura hrem a ni a, Wolves an hneh ṭumin a awl tawh a ni.

Ryan Fraser pawh inhliam vangin a la inlan thei dawn lo a, ani erawh Howe hnuaiah player pawimawh a ni pha lo. Magpies hian club ṭha Liverpool, Man United (League Cup) leh Man City te an hmachhawn zawn a, an chak lo vek. Match hnuhnung berah erawh Wolves 2-1 in an hneh a, an result ṭha hi chhunzawm an tum ang.

Howe hian match thum a chak loh zawn hnuah starting eleven a siksawi a, chutihrualin tlarhnunga player keeper Nick Pope bakah defender Kieran Trippier, Sven Botman leh Dan Burn te an pawimawh a, midfield-ah Bruno Guimarães chu team khaipa a ni bawk.

Tlarhmaah Alexander Isak-a'n inhliam vangin season a hmang ṭha tawk lo a, tunah erawh a dam leh tawh a, Wolves lakah pawh goal hmahruai a khung a ni.

Thih leh dam

Nottingham Forest hi 14-naah awm mah se thih leh dam inkara leng zingah an tel a, Premier League relegation battle-ah hian team pakua an telah a ngaih theih. Forest hian match hnuhnung pangaah chak an nei lo a, vawi thum ngawt an chak loh avangin insiamṭhat an mamawh hle.

Forest hian point 15 hmuh theih aṭangin point hnih chauh hmu mah se champion lai Manchester City lakah point an hmu thei a, dah hniam theih an ni lo. Tlarhmaa awm Brennan Johnson-a'n tun season league match-ah goal kua a khung tawh a, Forest hi relegate pawh ni se Welsh forward hian Premier League khelhna tur a nei dawn.

Chutihrualin Johnson pawhin Forest hi a chhan theih chuan a hlutna a sang zawk dawn tih a hre ngei ang. Mahse, Johnson hi Spurs an hneh loh ṭumin a inhliam a, a dinhmun a chiang lo. Forest hian first team player dinhmun chiang lo 10 vel zet an nei a, an muala khelh tur ni mah se hna a hautak ang.