Stoke-in Boro an chelh

Premier League khelh tum Middlesbrough chuan Thawhlehni zan khan Stoke City an mikhual a, 1-1 in an inhnehtawk. Boro hian Chuba Akpom hmangin goal khung hmasa mah se Stoke hian Ki-Jana Hoever hmangin siphurh an sut.

Championship-ah Michael Carrick-a enkawl Boro hi pathumnaah an awm chhunzawm a, amaherawhchu Stoke laka point hnih an hloh avangin an chung chiaha awm Sheffield United an inkar an tizim tam thei ta lo.

Blades hian nizan khan Sunderland an hmachhawn a, hnehna an chang a nih chuan Boro lakah hian point rukin an sang fel leh thei ang. Championship aṭangin a sang pahnih hi Premier League khel turin an tling nghal dawn a, hmahruaitu Burnley chu chiang tluka ngaih a ni tawh.

Hmunruak pakhat dang hnawhkhat turin Sheffield dinhmun a ṭha a, amaherawhchu Blades hi Boro, Luton leh Millwall ten an la tibuai pha thei thung. Palina aṭanga parukna ten playoff hmangin Premier League khel tur an zawng bawk dawn a, Carrick-a hote hi an inpettling nghal thei lo a nih pawhin playoff chu an khelh phak ngei a rinawm ta hle.