Lazio tan chak a ṭul

Europa Conference League last 16 second leg chu nizan aṭang khan khelh ṭan a ni leh tawh a, team ngaihven hlawh zingah Lazio chu zanin dar 1:30 hian an inlan dawn - khualmualah AZ Alkmaar an lenchilh ang.

Lazio hian first leg-ah rin loh takin AZ Alkmaar hi an ngam lo a, 2-1 in an tlawm. An muala an tlawm zawh hian Lazio boss Maurizio Sarri chuan, "Result mak tak a ni," tiin an tlawm chu a hriathhiam loh thu a sawi.

Serie A club tan last 16 lut turin zaninah goal hnih tal khung a ngai a, an lamah goal an chhuah loh a ngai bawk - hetihlai hian striker chhuanvawr Ciro Immobile a inhliam bawk si avangin Lazio tan a awlsam dawn lo.

Kum 33 mi Immobile hi tun season-ah hliam vangin a talbuai ṭhin a, heti chung hian inelna hrang hrangah match 27 khela goal 11 khungin, assist vawi nga a nei a, a la ṭangkai hle - AZ nen an inhmachhawn hmasakah hliam vang thoin a lo inlan thei lo tawh bawk.

AZ hi European match an khelmuala an khelh hnuhnung 23-ah an tlawm miah lo - match 15 hnehna changin, vawi riat draw an nei a, Dutch club laka an tlawm hnua Bologna nena 0-0 a inhnehtawk Lazio tan hna a harsa dawn tih a chiang. AZ hi inelna hrang hranga an match hnuhnung paliah an tlawm lo tawh a, team boruak fuh lai tak a ni.