Thilmak a reh; Liverpool beiseina a thamral

Liverpool boss Jurgen Klopp-a'n, "1% chance chauh kan nei a ni mai thei a, mahse, kan theihtawp kan chhuah ang," tiin Real Madrid laka comeback an tum thu sawi mah se an beiseina chu mei khu ang chauh a ni a, boruakah a zam ral.

Nilaini zan khan Liverpool-in Champions League last 16 second leg-ah 1-0 in Real Madrid an ngam lo a, Karim Benzema chuan inkhela goal awmchhun a khung. Anfield-a 5-2 ngawta an ngam loh team lakah Reds-in goal thum tala chak mamawh mah se an tlawm nawn ta zawk - inkhel pahnih belhkhawmah 6-2 in an tlawm a, CL-a aggregate-a an tlawm tamna ber a la ni!

Liverpool hian season thum zet chu a zawnin Champions League-ah Real Madrid an ngam lo ta. Reds hian 2020-21 season khan quarterfinal-ah Real hi an ngam lo a, season hman zawh takah khan final-ah an ngam lo bawk.

Jurgen Klopp leh a naute tan chuan Real Madrid hi mangchhia an ni ber a, Champions League aṭanga an tlak leh tak bawk siah chuan Liverpool hian tun season-ah nomawi an chawi dawn lo tih a chiang tawh.

Beisei bo

Jurgen Klopp-a'n season hmasa Champions League final-a Real Madrid an ngam loh khan, "Nakkum final khelhna tur hi Istanbul a ni lawm ni? Hotel min ngaihtuahsak nghal rawh u," tiin a sawi a, season zawna final luh ngei a tum.

Mahse, last 16-ah vawi hnih ngawt final-a an ngam loh hnu Real an tawng a, first leg-ah goal hnih an khung hmasa chungin Spanish club lakah an chesual zui a, Anfield-ah 5-2 in an tlawm.

Mi tam zawkin Liverpool tan beisei an neihpui tawh lo a, first leg zawh rualin media tam zawk chuan Merseyside club hi an mangṭha tawh - mahse, Liverpool an ni miau a, thilmak an beisei tlat.

English club zinga Champions League nomawi chawi ngun ber team hian AC Milan leh Barcelona lakah thawnthu chuai thei lo an lo ziak tawh a, beiseina an nei lui tlat pawh an demawm hran lo.

A tak ram

Mahse, a tak ram leh duhthusam chu thil dang daih a ni a, Liverpool fan-te beisei angin thil a thleng lo a ni mai lo a, Santiago Bernabeu-ah chak phuin Liverpool an khel chhuak lo.

Klopp-a'n goal khung tam an mamawh tih hriain Diogo Jota, Darwin Nunez, Mohamed Salah leh Cody Gakpo te a tlar nghal a, mahse, beisei ang erawhin Real an nawr thei lo tih a lang.

Reds tan Darwin Nunez chuan minute rukna lekah chance duhawm a nei nghal a, Uruguayan striker hian a chance neih kha Thibaut Courtois zawnah pet loin goal-ah khung ta se inkhel thawnthu a danglam mai thei.

Mahse, 'ta se...' tih chu Liverpool chan tawk a ni a, minute 78-naah Benzema chuan Vinicius Jr-a siamsak aṭanga khungin, 1-0 a ni a, Liverpool an tla dawn tih a chiang tel nghal bawk. Benzema hi a goal khungna lamah inhliam mah se inkhelh zawhah a ṭhat thu a sawi a, kartawp league match-a Barcelona an hmachhawn hunah a inlan thei dawn.

Beisei phak lo

Klopp-a'n tlarhmaah goal nawr na ṭhiau player pali rem mah se Reds-in an nawr na tawk lo a, a nihna takah chuan goal khat aia tam an chhuah lo chu Liverpool an vannei hle.

Tun season-a Liverpool player zinga 'form' awmchhuna chhal ngam Alisson chu Reds tan chhandamtu a ni a, Brazilian keeper-in first half-a Vinicius leh Eduardo Camavinga khung ngei tura ngaih a dansakte chu keeper thiam bik tan lo chuan dan chi a ni lo.

Alisson hian Federico Valverde leh Benzema khung ngei tura ngaih chu a dansak bawk a, a tawi zawnga sawi chuan Liverpool mualpho belhchhahna tur chhanhimtu chu Brazil number 1 keeper hi a ni.

Goal venhim bak mamawh lo Real-in Liverpool lakah chance an nei mawlh mawlh a, goal thum khung mamawh Liverpool an reh thung - minute 37-naa James Milner-a shot hnua Reds-in shot an neih leh hmasak ber chu minute 82-naa Harvey Elliott-a chance neih chu a ni a, Konstantinos Tsimikas-a handball anga lang penalty an chawi lo chu Liverpool mualpho zualpui tur khuhna a ni.

A harsa tawh dawn - Klopp

Liverpool-in season hmasa khan season tawp dawn kar thleng khan nomawi pali chawi beiseiin, quadruple champion nih an tum a, inelna an telnaah chuan match khelh theih zawng zawng an khel vek!

Reds hian League Cup leh FA Cup-ah champion nomawi an chawi a, Premier League tawp niah Manchester City an phak lo a, Champions League final-ah Real an ngam ta lo bawk - nomawi pahnih chawi ta lo mah se season tawp thlenga nomawi pali an beisei thei hi a ropui lai chu a ni.

Liverpool fan-ten nghakhlel takin season thar an thlir a, mahse, March 15 a herchhuah meuh chuan eng nomawi mah an chawi dawn lo tih a chiang fel der tawh a, season thara Champions League an khelh dawn leh dawn loh pawh a chiang tawh lo!

Klopp cuan, "Game ṭha tak khel turin kan inbuatsaih a, mahse, khelmualah kan inbuatsaih angin kan che thei tlat lo. Tlang kan phu lo a, kan tla ta hi mi pawhin mak an ti lo," a ti a, an khelh danah tlang an phu loh thu a sawi.

Reds hian season nga chhungin Champions League final vawi thum an lut a, hengah hian Sadio Mane, Roberto Firmino leh Mohamed Salah chu player langsar an ni. Mahse, tunah chuan he tlarhma hmuhnawm tak hi an bo ṭan - Bayern Munich tan Sadio Mane a khel tawh a, season tharah Firmino a chhuak dawn bawk a, Salah chiah a awm tawh.

Heng zawng zawnga a ṭhiante fuih phurtu leh captain nih tlin tak Jordan Henderson pawh kum 33 a ni tawh a, Real laka bul ṭan James Milner kha kum 37 a ni tawh - Klopp-a'n a player hman thiam sa a chân ṭan a, team thar a din a ṭul ta niin a lang.

Reds hian Premier League-ah palina Spurs chu point rukin an phak lo mek a, match khatin an khel tlem zawk - Manchester City (Etihad Stadium), Chelsea (Stamford Bridge) leh Arsenal (Anfield) an hmachhawn zui dawn bawk a, season thara Champions League khel lo thei dinhmunah an ding mek.

Klopp chuan, "Champions League-a kan sulhnu thlirin, he inelna hi chu champion ngei tumin kan hmachhawn ṭhin. He inelna hi chu kum tina hmachhawn ve kan duh a, mahse, tunah chuan a harsa tawh dawn a ni," tiin an hmabak hautakzia a hai lo.

German coach chuan an hmabak thlir zuiin, "International break kan hmang ang a, chumi zawhah City, Chelsea leh Arsenal kan hmachhawn zui ang - heng match pathum hian kan hma hun tur thui takin a hril dawn a, he kar hi kan tan a pawimawh khawp ang.

"Kan tum ber chu kan theihna zawng zawng sawr khawma beih a ni a, top four-a season khar kan duh tih hi chu thil chiang sa a ni," a ti a, season thara Champions League khelh ngei a duh.