Chak chiang a awm bik lo - TBL Manager

Mizoram Super League (MSL) season 8 semifinal zan hnihna zanin dar 8:00 hian khelh a ni dawn. Vawi hnih champion tawh Khatla TBL leh Mission Veng Hotshots an inhmachhawn dawn, inkhel a hmuhnawm ang.

Team pahnih hi league round-ah vawi hnih an intawng, hengah hian TBL an chak ve ve. Chak tura rinkai ni mah se Khatla TBL manager H. Lalhruaitluanga a ṭawng fimkhur hle a, chak chiang sa an awm bik lo tih a sawi.

Hruaia chuan, "Tlang turin beiseina chu kan nei ngei mai, mahse semifinal a nih tawh chuan a boruak a danglam ṭhin a, chak tur chiang sa a sawi theih loh," tiin Vanglaini a hrilh a, an player zingah hliam leh hrem tawk an awm lo tih a sawi bawk.

March 9, Ningani zana team pahnih intawn ṭumin TBL tan - Joshua Keys (31 points), Vanlalrinchhana (20), Michael Liansanga (20) leh Vanlalṭhazuala (19) te an khel ṭha, zaninah pawh ven uluk ngai tur an ni.

An sulhnu leh season an hman dan thlirin Hotshots hi rinkai lo zawk an ni. Mahse, Hotshots coach Samuel Laldinpuia chuan, "Game a nia, engmah a hriat bik loh, chak ngei tumin kan bei dawn," tiin Vanglaini a hrilh ve bawk, pressure nei miah loin an khel dawn.

Mission Veng Hotshots hian Chritopher Galbreath Jr an nei a - TBL nen an intawn hmasakin point 45 zet a nei, ani thlawp tur hian tualchhung player ṭha Lalrozama an nei bawk - TBL tan fimkur taka hmachhawn an ngai ang.