Napoli tan hna harsa a awm lo

Diego Maradona khelh tawhna Napoli chuan season duhawm an hmang mek zel. Naples club hian Eintracht Frankfurt 3-0 in an hneh a, inkhel hmasa nen belhkhawmin German club hi 5-0 in an sawp.

Luciano Spalletti naute hian Serie A-ah fal takin hma an hruai mek. European football inelna sang Champions League quarterfinal an lut ta chiah bawk, an thlen chin apiang hi record thar a ni nghal zel.

Mi bik Osimhen

Eintracht Frankfurt khel-mualah khan Napoli hi si hnih faiin an chak tawh, dinhmun ṭha takah ding sa mah se Spalletti-a'n an ṭhat dan takin a naute a la remkhawm tho a, tlarhma laiah Victor Osimhen a awm.

Stadio Diego Armando Maradona-ah goal kan hmu mai lo, chawlhlawk hma chiahin Osimhen chuan goal a khung a, second half-ah Giovanni di Lorenzo-a cross chu hnai takah an goal hnih nan a khung belh bawk.

Osimhen hian Napoli tan tun season inelna hrang hrangah match 28 aṭangin goal 23 a khung tling ta chiah. Nigeria international hian penalty a hlawh chhuak zui bawk, mahse Piotr Zielinski chuan pet in 3-0 in an chak nuamsa.

Kum 24 mi Osimhen chuan, "Kan hun tawn apiang nuamti taka hman mai hi kan duh dan a ni, kan club tan thawnthu kan ziak thar mek zel. Duhthusam kan nei a, chumi tih hlawhtlin tum chuan coach hnung kan zui," a ti.

Spalletti a fimkhur

Tun hnai khan Manchester City manager Pep Guardiola chuan, Premier League hmahruaitu Arsenal leh Napoli te chu tun dinhmunah European team ṭha an nih thu a sawi. League leh UCL lama an elpui ni theite hi a fak tak tak lam aiin a chhaihna niin a lang.

Napoli coach Spalletti chuan, "Kan chungchang an sawi dan ka hria, mahse hei chu an rilru tak tak a ni lo. Bazar nana euro maktaduai 900 hmang thei leh, keini euro maktaduai 9 vel chauh nei chu khaikhin chi kan ni lo.

"Kan chetsual theih nan kan rilru tih buai an tumna mai a ni," a ti a, a striker Osimhen chu player ṭha bik a ni a ti a, hun harsaah pawh mahnia goal tur sual chhuak thei leh team tana player ṭangkai bik a nih tel thu a sawi bawk.

Champions League quarter-final draw chu vawiin tlai dar 4:30 hian Nyon, Switzerland-ah neih a ni dawn. Inkhel tur an hriat hma aṭangin coach ṭhenkhat chuan an khingpui ni thei tur chu an lo chhaih ṭan nghal der tawh a ni.