Vawiin tlai dar 4:30-ah UCL draw neih a ni dawn

UEFA Champions League-ah quarterfinal lut tur a chiang tawh a, vawiin tlai dar 4:30 hian Nyon, Switzerland-ah neih a ni dawn. UCL draw-ah hian seeded an awm tawh dawn lo a, ram khat club pawh an inkhel thei tawh ang.

Europe rama club football inelna sang berah Italy-in club pathum ngawt an la thawh a; Inter Milan, AC Milan leh Napoli te an la dam. England aṭangin club pahnih Manchester City leh Chelsea ten quarterfinal an khel dawn. Spain, Germany leh Portugal ten club pakhat ṭheuh an la thawh a, chungte chu Real Madrid, Bayern Munich leh Benfica te an ni.

Draw kalphung

UCL quarterfinal chinah hi chuan seeded an awm tawh lo a, eng team pawh an intum thei vek tawh. Ram khat club pawh an inhmachhawn thei tawh a, Manchester City leh Chelsea pawh intum thei zinga mi an ni a, Milan derby a thleng thei bawk.

UCL draw-ah chi thum thliar a ni a, quarterfinal intum tur an pawh zawh hian semifinal-a an inhmachhawn theih dan tur an pawt lawk ang. A ṭum thumnaah hian tute home-ah nge an khelh hmasak dawn tih pawh a ni bawk ang.

Engtin zel?

Tun season UCL-ah hian away goal rule a awm tawh lo a, aggregate-a an inhnehtawk a nih chuan extra time khelh tur a ni a, an la inhnehtawk fo a nih chuan penalty hmanga chak zawk zawn tur a ni.

Quarterfinal first leg hi April 11-12, 2023-a khelh tur a ni a, second leg hi April 18-19, 2023-ah khelh a ni ang. Semifinal hi May 9-10, 2023 leh May 16-17, 2023 ah khelh tur a ni a, final hi June 10, Inrinni hian Ataturk Olympic Stadium, Istanbul-ah khelh a ni ang.

Final khelhna tur hmun hi Liverpool-in AC Milan an lehthalna hmun kha a ni a, chutihrualin Liverpool-in Real Madrid an hneh loh avangin 2005 final rematch erawh a thleng nawn dawn tawh lo.