Monte Carlo khel tur zingah Nadal

Hliam vanga chawl mek Rafal Nadal chuan Monte Carlo khelh a tum. Spanish star hi a khel bawr hliam vangin inkhel thei rih lo mah se, a inkhelh thiamna clay court season chu hman ngei a tum ruh hle.

Grand Slam vawi 22 champion tawh Nadal hi Australian Open hnuah a la inkhel leh lo, season khat chhunga Grand Slam hmasa berah khan Mackenzie McDonald hneh loin second round lekah a zinkawng a tawp - a nomawi kawl lai a chan nghal bawk.

Indian Wells leh Miami Masters aṭangin a inhnukdawk a, tunah hian la inkhel thei chiah lo mah se training erawh a nei leh ṭan tawh. Monte Carlo tournament director David Massey chuan, "Rafa chu inziak lut hmasa ber a ni.

"Monaco-ah hian vawi 11 zet a champion tawh a, a inkhelh thiamna leh nuam a tihna hmunah hian inlan ngei a tum, kum 2005 aṭanga 2012 inkarah phei kha chuan a zawnin vawi riat ngawt a champion," tiin Nadal chungchang a sawi.

Kum 36 mi Nadal hian April 9-16 chhunga khelh ṭhin Monte Carlo Masters hi French Open inbuatsaih nan a hmang ṭhin. Clay court inelna hi a inkhelh thiamna a ni a, Paris khawpui a pan hma ngeiin inrintawkna neih ngheh leh a tum.