Europe inelnaa tel tumten relegate hlaute an hneh

Nilaini zan Premier League inkhel aṭanga teh chuan Premier League aṭanga tlak hlauhna aiin season thara Europe khelh châkna a lian zawk niin a lang. Table chanve chunglama awm Brighton & Hove Albion leh Brentford te chuan table hnuai lama awm Crystal Palace leh Southampton te an hneh.

Amex Stadium-ah Solly March chuan minute 15-naah Seagulls tan goal pawimawh a khung a, Roberto De Zerbi-a hoten Crystal Palace 1-0 in an hneh. St. Mary's Stadium-ah Brentford-in Ivan Toney leh Yoane Wissa te goal hmangin Saints 2-0 in an hneh ve bawk.

Zaninah Premier League inkhel a awm zui dawn a, Newcatle United-in City Ground-ah Nottingham Forest an hmachhawn dawn. Magpies hi Europe inelnaa tel tum an ni a, Nottingham hi relegate hlau an ni thung.

Arsenal umtu Bees

Brentford-in nikum October 23-a Aston Villa an hneh loh hnuah hun rei tak chak loh an tawng lo a, March 11, Inrinni khan Everton lakah an tlawm leh chauh. Bees hian insiamṭha turin hun rei an mamawh lo a, kar khat pawh tling loah chak hmel an hmu lehnghal.

Saints-in Old Trafford-ah point hlawhchhuak thei mah se an mualah Bees an hneh lo. Brentford forward Bryan Mbeumo chuan minute 32-naah corner a pet a, Christian Norgaard chuan tauh pialin Ivan Toney-a'n a tlawh goal.

Southampton-in na takin an nawr let a, siphurh sut ngei an tum. Amaherawhchu Bees tlarhnung a phui ṭha a, Saints tlarhma finishing a ṭha lo ve bawk. Injury time-ah pawh minute sarihnaah Bees hian an vaw let a, Yoane Wissa-a'n chak nemnghehna goal a khung.

Inkhelh banah Toney chuan, "Inelna harsa tak a ni a, Arsenal kan umphak theih mai ka ring," tiin fiamthu pahin hmahruaitu Arsenal an la umphak theih thu a sawi. Brentford tan Gunners umphak hi thil theih ni lo mah se Thomas Frank-a hote Europa League khel thei dinhmunah an ding a, chumi tur chuan season tawp thlengin theihtawp an chhuah ang.

Brighton an êng

Season ṭantirh lamah Chelsea-in Brighton hi an manager Graham Potter an chhuhsak a, an player pawimawh Yves Bissouma leh Marc Cucurella te an chhuak bawk. Seagulls hian manager leh player ṭha chân mah se dinhmun ṭha takah an la ding tho.

Brighton hian Nilaini zan khan Crystal Palace chu Solly March-a goal hmangin an hneh a, point thum hlu tak an hlawh chhuak. Brighton manager De Zerbi chuan, "Goal hnihna kan khung theih loh avangin hun tawp lamah kan tawrh phah. Mahse Arsenal, Manchester City, Manchester United emaw Liverpool kan ni lo a, Brighton kan nih miau avangin kan chak dan pawh a awlsam thei lo," tiin a sawi.

Seagulls hian kum 2023 chhungin league match pakua aṭangin point 18 (P9 W5 D3 L1) an hlawh chhuak a, anmahni aia point hmu tam chu Manchester City (25) leh Arsenal (23) te chauh an ni.

Chakna goal khungtu Solly March hian Boxing Day leh a hnu lamah penalty tel loin goal sarih a khung tawh a, hemi hun chhunga penalty tel loa amah aia khung tam chu Marcus Rashford (10) leh Erling Haaland (8) te chauh an ni. Brighton hmalam hun a êng zel a, Patrick Vieira kaihhruai Palace erawh an dinhmun a him lo a, kartawpah league hmahruaitu Arsenal hmachhawn turin Emirates Stadium an tlawh ang.