Bale-a hmun ruak luah tur Ramsey

Wales player piang tawh zinga ropui ber ang hiala tam takin an ngaih Gareth Bale-a'n inkhelh a chawlhsan takah chuan, Aaron Ramsey hnenah Wales captain nihna hlan a ni a, Ben Davies chu vice captain atan ruat a ni bawk.

Wales boss Rob Page chuan, "Aaron hi Gareth-a hnuaiah Vice Captain a lo ni tawh ṭhin a, ka tan chuan ani Captain-a ruat hi thil nihphung tur ve reng a ni. Amah anga thiam leh ṭha hi mi dang pawh squad-ah an awm tho a, mahse, he thutlukna hi chu thil kalphung ve tur renga ka ngaih a ni.

"World Cup-a beisei kan phak loh hnuah khan Aaron pawh hian keimahni ang thoin hrehawm a ti a, hetih chhung zawng pawh hian Wales tana inkhelh zel a duhna hi a nghing ngai lo," a ti.

Kum 32 mi Ramsey hian Ligue 1 club Nice tan a khel mek a, Wales tan match 78 khela goal 20 khungin, tuna Wales squad zingah goalkeeper Wayne Hennessey (108) tih loh chu ani aia ram tana inlan hnem an awm lo.

Page chuan, "Aaron hian captain armband hi a phu a, Wales tan thil tam tak paltlangin, goal pawimawh tak tak he ram tan hian a khung a ni," a ti.

Wales hian March 25-ah UEFA Euro 2025 khel tura Croatia hmachhawnin, March 28-ah Latvia an mikhual dawn a, Page hian squad puang nghalin, Birmingham City midfielder Jordan James, Ipswich Town forward Nathan Broadhead, Swansea City midfielder Oli Cooper leh Fulham midfielder, kum 17 mi Luke Harris te chu ram tana la inlan ngai lo squad-a awm an ni - Joe Allen, Chris Gunter leh Jonny Williams te chuan ram tana inkhelh an chawlhsan tawh thung.

Page chuan Vice Captain atana thlan, Tottenham Hotspur defender Ben Davies chungchang sawi zuiin, "Ben Davies hi nakina Captain la ni thei tura ka ngaih a ni a, Gareth leh Aaron te thawhdun ang khan Captain a thawhpui dawn a ni," a ti a, Davies hi ram tan vawi 77 a inlan tawh.