Kum 41 mi Ibra ram tan an ko

"Uain ṭha mi ang mai ka ni a, ka ṭha tulh tulh a ni," titu Zlatan Ibrahimovic chu kum 41-ah pawh ram tana inlan tura koh a la ni - Zlatan hi Sweden chuan European Championship qualifier khel turin an ko a, March 24 hian Belgium hmachhawnin, March 27-ah Azerbaijan an mikhual bawk ang.

AC Milan forward hian khup hliam vangin tun season chu khelmual pawn lamah hun a hmang tam zawk a, match thum chiah Italian club tan tun season-ah a la khel - hei pawh bench aṭanga a luh vek a ni.

Sweden boss Janne Andersson chuan, "Ibrahimovic hi bul ṭan nghal turin ka beisei lo a, mahse, kan squad erawh a tichhah dawn a ni," a ti a, Ibra chu bench lam a thla timuang tura ko a nih thu a sawi.

Ibra hian Euro 2016 khan ram tana inkhelh a chawlhsan a, mahse, 2021 khan World Cup qualifier khel turin ram tan a lo kir leh a, mahse, December, 2022-a khelh zawh tak World Cup-ah khan an inpetkai zo chuang lo.

March 29, 2022 khan Ibra hian World Cup qualifier-ah Poland hmachhawnin, 2-0 in an tlawm a, ram tana a inlan hnuhnung ber niin tunah koh a ni leh ta.

Sweden tan Ibra hian match 121-ah goal 62 khungin ram tana goal khung hnem ber a ni mek. Tuna a khelh mekna Milan-ah hian 2019 khan kirin, match 77-ah goal 36 ngawt a khung.

Ibra hian an ram club Malmo aṭanga a career ṭanin Ajax, Juventus, Inter Milan, Barcelona, Paris St-Germain, Manchester United leh LA Galaxy tana khelin, Malmo leh Galaxy tih lohah chuan champion nomawi a chawi vek thei a ni.