Vawi ruk chak zawn 76ers

Philadelphia 76ers chuan playoff khelh tuma an elpui Cleveland Cavaliers 118-109 in an hneh a, tun hnaiah a zawna vawi ruk an chakna niin Eastern Conference table-ah pathumna dinhmun an luah.

Philadelphia tan point 38 neitu Joel Embiid a langsar a, an player pawimawh hi hnawhchhuah ni hman zauh mah se 76ers coach Doc Rivers-a'n ennawn turin a ngen a, an thutlukna an sutsak a ni.

Chak lo Cleveland Cavaliers pawh Eastern Conference table-ah palina an la ni, match 44 an chak tling tawh - playoff khel turin an dinhmun la ti chiang chiah lo mah se, tuna an awmna pawh a him ṭha rih hle.

Inkhel dangah Stephen Curry-a'n point 50 neiin, tun season chhunga point 50 a neih tlin vawi hnihna a ni. Mahse, a team Golden State Warriors chu Los Angeles Clippers lakah 134-126 in an chak lo.

NBA champion lai Golden State hi Western Conference-ah pangana an ni mek, playoff khel turin chetsual fo a remchang rih lo, an hnuaia team pali ngawt chu an chetsual zauha anmahni tlanpel thei mai an la ni.

Miami Heat chuan Memphis Grizzlies 138-119 in an hneh. LeBron James leh Anthony Davies te tel theih lohna Los Angeles Lakers chu 114-110 in Western Conference mawngphah Houston Rockets lakah an chak lo thung.