Arsenal tan European Football a tawp; Premier League match 11 chauh an hmabak ta

Arsenal chu Sporting Lisbon hneh loin Europa League last 16 aṭangin an tla. Gunners leh Sporting hi inkhel pahnih belhkhawmah 3-3 in an inhnehtawk a, penalty hmanga chak zawk zawn niin Portuguese club hi 5-3 in an chak.

Mikel Arteta naute hian Premier League bak champion beiseina an nei tawh lo, an tla fai vek tawh. EPL-ah erawh hmahruaitu an ni - Pathianni zan dar 7:30 hian Emirates Stadium-ah Crystal Palace an mikhual leh nghal ang.

An chak lo

Jose Alvalade Stadium-a an inkhelh ṭum khan Arsenal hian an goal neihsa an hum thei lo a, 2-2 in an inhnehtawk. Emirates Stadium-ah pawh Granit Xhaka hmangin minute 19-naah goal hmahruai an khung.

Mahse, second half-ah goal ropui kan hmu. Pedro Goncalves-a'n mual laiah Arsenal ball hloh a chang a, a awmna aṭanga goal hlat zawng chu yard 46 teh meuh a la ni, mahse second tlemte chhungin thutlukna dik a siam.

Gunners goalkeeper Aaron Ramsdale a rawn kal chhuak tih a hmu a, hei vang hian hla zet aṭangin goal lamah a pet thut - Ramsdale tlan let mah se an goal-a lut tur a dang thei tawh lo, an in rep chiang hle.

Goal dang kan hmu zui tawh lo, mikhual Sporting tana penalty chhuihtu zawng zawngin an khung laiin, forward Gabriel Martinelli pet erawh goalkeeper Adan-a'n a lo dansak a, kum 2018 hnua a vawi khat nen European football-ah quarterfinal an lut.

Saliba leh Tomi

Minute kuana lekah hliam vangin Takehiro Tomiyasu thlak a ngai a, minute 21-naah William Saliba chu hliam vang bawka lak chhuah a ni - defender pahnih hi engtiang chena rei nge an chawlh dawn a hriat loh.

Arteta chuan, "A lan dan maiah chuan Tomiyasu a hliam na, William erawh na tak a nih loh kan beisei," a ti. Pathianni zana Crystal Palace an mikhual hunah chuan an chhawr theih a beisei awm rih lo a ni.

Hliam vangin Arsenal an buai dawn, tun hnai khan Manchester United chuan Gunners chu hliam vanga buai ve lo angin a sawi. Arteta chuan, "Gabriel Jesus leh Emile Smith Rowe te thla li an inkhel thei lo. Thomas Partey leh Eddie Nketiah te pawh an hliam.

"Harsatna hrang hrang kan paltlang ve a, a tawp thlengin kan bei zui ang," a ti. Sporting lakah Jesus-a'n bul a ṭan leh thei tawh - World Cup hnuah inkhel bul a ṭan lehna hmasa a ni; Pathianni zanah pawh Palace a hmachhawn ang.

Final match 11

Arsenal manager Mikel Arteta chuan Premier League match khelh hmabak 11 an la neih chu an tan final vek a nih thu a sawi a, an tan Crystal Palace chu final hmasa a nih thu a sawi. Captain Martin Odegaard pawhin an tan final vek a ni tawh tih a sawi bawk.

Odegaard chuan, "Kan chak loh hnu khan inthlakna lamah kan lut a, player tin chuan inhrilh nawn kher ngai loin kan hmabak match 11 la awm chu final vek a ni tih kan hria, chumi hmachhawn tur chuan rilru pawh kan seng nghal der tawh," a ti.

Gunners hian Premier League an khelh hnuhnung bera hnehna changtu player panga ngawt an thlak; Europa League champion nih chu an duh ngei ang, chutih rualin an ngaih pawimawh zawk chu Premier League a ni tih a lang.

Captain Odegaard chuan, "A nihna tak sawi chuan player ṭhenkhat chu an chau tih a hriat, a bikin a khel tluante an hah. Pathianni zan atan erawh inpeih leh hman kan tum ang, chu chu tana kan tih theih ṭha ber a ni," tiin a sawi.

Patrick Vieira an ban!

Crystal Palace chuan an manager Patrick Vieira chu nimin tlai khan an ban. Arsenal legend hian a club hlui a hmachhawn thei dawn lo, kuminah match 12 khel tawhin chak ni hmel an la hmu miah lo - Palace tan boruak thar hip a ngai.

Palace hian an match hnuhnung berah Brighton an ngam lo, relegation zone aṭanga an himna hi point thum chauh a ni. Vieira rual hian a coaching staff - Osian Roberts, Kristian Wilson leh Said Aigoun te pawhin club an chhuahsan nghal.

Club chairman Steve Parish chuan, "Thutlukna siam harsa tak chu a ni. Chutih rualin tun hnai kan result chhutin danglamna kan mamawh bawk si, Premier League kan khelh chhunzawm theihna a nih beiseiin thu kan ti tlu," a ti.

Premier League table-a 12-na nilai Palace hian Vieira thlaktu tur an la puang lo a, nimin tlai thleng kha chuan Arsenal laka team kaihruaitu tur pawh an la sawi lo. Goalkeeping coach Dean Kiely erawhin a hna ngai a chelh ang.