Inkhel hmuhnawmah BCA an chak

Point tam ber zan a ni lo a, mimala che ṭha fal tak sawi tur awm zan a ni lo bawk. Mahse, Ningani zana Zarkawt BCA leh Bungkawn LB Associates te inkhel kha tun season Mizoram Super League match boruak 'hot' ber a la nih a rinawm.

R. Dengṭhuama Indoor Stadium, Mualpuia inkhelah BCA hian 93-68 in hnehna an chang. Zanin dar 8:00 hian a hmun ngaiah semifinal game 2 an khel leh dawn - Bungkawn LB tan chak lo a thiang lo, thapui an thawh dawn.

Zarkawt BCA hian league round bikah vawi khat chiah chak loh an nei, an hneh loh awmchhun chu Bungkawn LB an ni. Vawi khat an hneh lo a, ṭum khat chu an hneh thung, an chak ṭum pawhin point khat chauhin an sang.

Semifinal-ah pawh team pahnih hi a tir lamah chuan an inkhel tawk viau, mahse second half-ah inkhel boruak a sang a, tawnhriat nei tlem Bungkawn an zuih. Champion lai meuh hneh tur chuan hniam lai nei loa an khelh mar ṭhat a ngai.

Bungkawn coach KC Lalliantluanga chuan, "Beiseina kan la nei, kan hmabakah hian theihtawp kan chhuah dawn. BCA kan hneh thei tih kan lantir tawh a, lantir nawn leh kan tum ang," tiin Vanglaini a hrilh a, chak an la tum dawn.

LB rinrawl Everrett Lorenzo Pleasant-a'n point 37 nei mah se tualchhung player aṭangin thlawpna a hmu ṭha tawk lo a, free throw vawi 15 a hmuh zinga pakua chauh a ti hlawhtling bawk, team chak pui leh tur chuan chet ṭhat leh zual a ngai.

Hun harsa laiah BCA lamin an tawnhriat neih an chhawr, second half-ah boruak a nung a, tawnhriat ngah Lalrina Renthlei thinrim a insum zo lo a, guard Zonunsanga pawh coach Lalruatfela'n a khap daih a ngai hial.

Boruak sang karah pawh Lalrina Renthlei hian point 21 a nei thei tho a, basket bawr vela tal na thei tak Joseph Allen-a'n point 39 a neih bakah Zonuna leh Matthew Remtluanga Sailo ten 3-points an lut leh zauh ṭhin, zaninah pawh chak tlang nghal an tum ang.